厲害厲害，可喜可賀，香港醫生妙手回春，創出心肝齊換嘅奇迹！
一位廿七歲女人有家族遺傳病，肝臟無法分解蛋白質，連帶心臟亦受影響，兩者都要更換。好彩伊利沙伯醫院日前收到一位死者捐出心、肝、腎，決定交由瑪麗醫院為呢位女病人進行心肝齊換手術，而腎臟就捐畀另一位腎衰竭病人，兩項手術都喺尋日完成。
講開心肝齊換手術，一啲都唔簡單。事關同時進行心臟及肝臟移植涉及好多個器官駁口，技術好複雜，難度非常高，全球只有好少成功案例。今次手術做咗十七粒鐘，可想而知過程有幾咁艱難，幸好最終能夠順利完成，充分證明香港醫生醫術高明。正如專家話齋，香港首次進行心肝齊換手術，係醫學界嘅大突破，為性命垂危病人帶來新希望！
更加值得高興嘅係，原來呢位女病人嘅肝臟仍然用得，醫院安排將佢嘅肝臟換畀一位肝癌病人，又救多一個病人。即係話，一人捐贈器官，可以救番三條人命，如果話救人一命勝造七級浮屠，救人三命直頭係功德無量。醫生仁心仁術固然抵讚，而器官捐贈者更加值得表揚！
話時話，公立醫院連心肝齊換咁複雜嘅手術都做到，但點解做一啲好簡單嘅手術反而成日出事呢？嗱，就以最近嚟講，六月有一位工人右膝受傷，東區醫院竟然左右不分，做錯左腳手術；七月有一位病人喺長洲醫院插胃喉餵食，護士竟然將條喉插錯支氣管，「餵死」病人；同樣係七月，一位鼻咽癌病人喺瑪麗醫院進行手術，懷疑醫生手術後冇做詳細檢查，喺病人氣管腫脹下倉促拔走氧氣喉，結果搞到病人腦部缺氧，變咗植物人。
心肝齊換創奇迹，簡單手術多甩漏，反映香港唔係無好嘅醫療人才，唔係無好嘅醫療設備，亦唔係無好嘅醫療技術，只係無好嘅管理水平。近年公立醫院烏龍百出，事故多多，皆因醫管局管理混亂，資源錯配，肥上瘦下，搞到前線醫護人員士無鬥志，爭相逃亡，紛紛轉投私家醫院，留低嘅就被迫承受更大嘅工作壓力，喺咁嘅情況下，又點可能唔出事吖！
難為當局仲吹水唔抹嘴，話要發展醫療產業喎。冇錯，香港醫療有人才、有設備、有技術，醫療產業本來係大有可為嘅。問題係，當局管理亂晒龍，醫療事故無日無之，又點樣發展醫療產業呀？
講到底，公共醫療百病叢生，問題出喺管理層，佢哋管理無方、得過且過、草菅人命，簡直係「冇心肝」。睇嚟最需要心肝齊換嘅就係醫管局！