一個重二百幾三百公斤嘅僭建巨型招牌，應該點樣處理？係即刻要求業主清拆呢，定係忍吓先，由得個招牌溶溶爛爛條條Fing，隨時跌落嚟砸死人呢？
可能大家會覺得功夫茶多此一問，咁大個招牌跌落嚟唔係講玩㗎嘛，人命關天，梗係清拆啦！唉，如果屋宇署識得咁做，就唔會發生兩年前灣仔一間食肆巨型招牌倒塌，砸死一名四十七歲美容院女職員嘅慘劇啦！
呢嗱，死因庭尋日雖然裁定死者係死於意外，但就話涉案店舖早喺○○年安裝招牌之後，屋宇署牌照部測量師曾經勘察過，證實呢個招牌係僭建物，但面積同用料等屬「可容忍範圍」，結構狀況亦都令人滿意，認為唔會對公眾構成威脅，只係「強烈勸喻」商舖自己清拆招牌。
強烈勸喻即係點呀？正如裁判官質疑，咁巨型嘅招牌，原來安裝之前唔使經過屋宇署事先批准，咁都不特止，食環署會根據屋宇署專業意見決定係唔係發牌畀食肆，既然咁大個僭建招牌戙喺度，都冇影響到牌照申請，亦即係話，屋宇署有屋宇署強烈勸喻，商舖根本睬你都傻，結果終於搞出人命！
屋宇署事後派測量師去冧招牌現場調查，發現個木製招牌只係靠膠水同幾粒螺絲穩固喺牆上，又無支架承托，連個頂都冇封到，長期日曬雨淋，搞到霉霉爛爛，又點會唔出事呀？計功夫茶話齋，今次與其話係一場意外，不如話係屋宇署容忍執法懶懶閒引致嘅人禍！
裁判官建議屋宇署加緊監管僭建招牌，要求商舖必須定期進行維修保養，署方應該加強巡邏甚至翻查全港同類招牌現況，一發現有問題即時跟進同查察。裁判官講得一啲都冇錯，之不過根據屋宇署往績，真係唔敢樂觀啦。講出嚟都嚇親人，原來家陣全港有成二十萬個招牌，其中大約兩萬個係棄置嘅，當中有唔少已經日久失修，甚至隨時冧得，最弊係屋宇署一直懶理，唔係推搪話冇接到投訴，就係話冇即時危險。今年六月油麻地又有一個二百磅重招牌跌落嚟，好彩只係砸傷一個途人，算係不幸中之大幸，全港到底有幾多會從天而降嘅計時炸彈，就真係天曉得嘞！
屋宇署監管僭建招牌固然好有問題，對遍地開花嘅舊樓安全隱患，就更加係隻眼開隻眼閉。遠嘅唔講，好似今年初土瓜灣塌樓慘劇咁呀，之前咪又係多次發出修葺令，而且直到出事前夕，署方巡查後仲話冇即時危險，結果話口未完就成幢樓冧咗！所以話旨意屋宇署加強巡查同執法，盞嘥氣啦。
屋宇署署長區載佳，咪話功夫茶唔提醒你呀，如果繼續對僭建問題懶懶閒，忍得就忍，一下唔好彩再有僭建物傷人，到時市民就真係忍無可忍，要閣下人頭落地喇！