吓？唔係化？刁蠻港女又摑人？
嗱嗱嗱，你唔好同功夫茶講又係醉駕拒絕吹波波仲要掌摑警員呀，你更加唔好話摑人嗰個又係法官姪女呀，嬲o架。
哦，唔係，學上次被摑到暈陀陀嘅警員話齋，終審法院常任法官包致金有幾多個姪女吖。今次摑人嗰個斷估應該係普通港女一名，好似話姓唐，芳齡三十三歲，同政務司司長唐英年有冇親戚關係就不得而知嘞。至於被摑嗰個，姓梁二十九歲斯斯文文嘅「拖篋男」。
成件事係咁嘅，前日上班繁忙時間，唐小姐同梁先生合演一幕「地下鐵碰着她」，可惜結果完全唔浪漫，反而好倀雞、好潑辣、好暴力。兩人齊齊搭港鐵，齊齊喺香港站落車，可能因為人多手腳亂啩，梁先生拖住嗰個有轆尼龍篋唔覺意撞到唐小姐玉腿，被撞一方勃然大怒，老虎乸上身大興問罪之師。先而口角，繼而動武，唐小姐涉嫌連環出手摑六巴，啪啪啪，啪啪啪，掌風之迅若奔雷摑到梁先生閃避不及，臉上留低熱辣辣紅掌印。有人睇唔過眼，連忙通知月台職員報警拉人。求神拜佛，唔該法官大老爺今次秉公辦理，千祈唔好再令人懷疑司法不公，假如被告真係有權貴撐腰，更加唔好畀佢逍遙法外，再有人上街遊行抗議示威就肉酸死咯。
唉，卿本佳人，何故手痕？所以話啫，法官姪女摑警案確係影響深遠，隨時教壞女同胞。你知啦，港女出名刁蠻任性，公主病嚴重到隨時隨地發狼戾，你畀佢哋見到連襲警都話冇事，自自然然變本加厲見人就摑。雖然包致金冇幾多個姪女啫，之不過咁，你唔能夠排除一眾港女自以為識得幾個有錢佬就可以恃寵生驕吖嘛。權貴呢家嘢好得意嘅，男人想做權貴或者要花上半生精力，女人攀附權貴話唔定只需一晚工夫。
點都好啦，刁蠻港女胡亂摑人一定係唔啱o架嘞，兜巴星陋習一定要戒。之但係話分兩頭，假如摑得出師有名又唔同喎，功夫茶建議唐小姐同法官姪女Amina聯手打造「兜巴星儆惡懲奸二人組」，一於為香港人出番一啖冤氣。
即係咁，大家都見到香港康泰旅行團團友喺馬尼拉死得幾咁慘烈o架啦，菲律賓嗰班所謂特種部隊簡直蠢到冇朋友，功夫茶從來未見過咁豬髧兜嘅警察，談判又失敗，強攻更廢柴，搞來搞去搞咗成粒鐘都未攻得入槍手挾持人質嘅旅遊巴，害到成車人死咗一大半，無辜團友家破人亡。如果「兜巴星儆惡懲奸二人組」飛去馬尼拉一巴二巴摑落有份強攻甚至誤殺人質嘅警察臉上，香港人一定瞓身支持！
唔知大家有冇留意網上消息，「菲律賓警察」已經成為潮語，意思係廢柴、無能、退縮、懦弱等等，例句有「你做人唔好咁菲律賓警察啦」。所以咯喎，反正Amina身份特殊，三度襲警皆逍遙，不如替香港人越洋怒摑菲律賓警察，當做戴罪立功囉！