中環出更：啟剛富三代日理萬「機」
霍英東家族第三代嘅霍啟剛，近年專心幫手打理家族生意，財富與日俱增。今個星期一下午四點半，距離銀行閂門仲有半個鐘，卓妮就喺畢打街見到啟剛急步行上怡安華人行間滙豐銀行卓越理財中心，辦理個人財務。要進身卓越理財客戶，全面理財總值最少要港幣一百萬元，即係啟剛個人坐底有百萬身家。
瞓身撐父親申亞
啟剛上到卓越理財中心，攞咗張號碼籌排隊，然後坐喺梳化輪候獨立櫃位服務。啟剛喺等候期間，一邊飲嘢，一邊按手機打短訊，打得興起時，索性將杯飲品放喺大髀，如果係熱飲嘅話，真係戥佢擔心。最後啟剛埋到櫃位搞咗近二十分鐘後離開，之後繼續按手機同打電話，就算落扶手電梯都睇實個電話，真係日理萬機。
卓妮上前同啟剛打招呼，佢就笑笑口話：「咁犀利嘅，我上Bank都畀你見到！」問佢有乜大搞作要親身到銀行辦理，佢就話：「呢啲我唔講啦！」咁講吓佢女友「跳水公主」郭晶晶啦，問佢有冇上北京探晶晶？啟剛好怕醜話：「唔講啦！趕住返公司！」不過，啟剛返公司之前，又去咗上一間銀行嘅銀通自動櫃員機排隊㩒錢，所以無論理財有幾咁卓越，現金都係必須嘅！
其實當晚青年事務委員會舉行交流會討論港府申辦亞運，身兼港協暨奧委會義務副秘書長嘅啟剛都有撐場，仲戴住港協暨奧委會條領呔，等於瞓身撐父親、港協暨奧委會會長霍震霆（Tim）申辦亞運。正如Tim所講，申辦亞運所增加體育設施係為咗下一代嘅福祉，啟剛作為下一代都有份得益，所以兩父子互撐都係合情合理嘅！
卓妮