停車熄匙爭議多年，老朽一開始就反對，因為香港天氣濕熱難料，尤其是夏天悶熱翳焗。氣溫超過三十度，停車熄匙，毋須三分鐘，汽車內氣溫隨時飆升至三十六、七度，如此駕駛，已是活受罪，要是女伴化咗個濃妝，就算不溶於水，也抵受不住汗水侵蝕。大熱天時，在「蒸籠效應」下，唔焗病有鬼咯。
坦白講，若然老朽身旁有靚女，我必然不會停車，只好兜圈當轉運；當然，若然塞車，惟有揸把大葵扇為靚女効勞，一路撥，一路唱：「常備大葵扇，有熱唔使怕！」一路詛咒：你就諗啲屎橋，我就難受！一個和諧的社會，就咁被環境局局長邱騰華這種有姿勢冇實際嘅高官扼殺。
你話喇，連揸車都受罪，擾民之法若假環保之名通過，香港人又怎會快樂？尤其對一眾職業司機打擊最大，排隊等的士，頭五架有豁免冇問題，第六位就要焗住等撻車開冷氣，一冷一熱，在火與雪的交融下，何苦受此懲罰要變傷風流感？
高官成日隨口噏當秘笈，一味口號治港，一時話綠色生活：又唔見佢哋食素，又唔見市區馬路旁廣植樹木？一時為藍天打氣：又唔見邱騰華、潘潔踩單車返工？揸架電動車都係做吓騷，一如環保團體所講，對改善空氣質素作用不大。
早排內地「大風沙」吹到香港，搞到空氣質素差上加差，旺角、觀塘、銅鑼灣等污染指數爆燈。眼見香港人如烏鴉飛入非洲黑森林，而邱局長只能隔岸觀沙塵，笑看灰上灰落，完全一籌莫展。大佬啊，唔該施展幾道真本領，等我哋活得自然和諧啲！