火箭淘金未絕望

誓過拓荒者入季後賽

距離NBA常規賽煞科日已不足一個月，現時排於西岸第九位嘅火箭，絕對需要在餘下賽事盡量贏波，並寄望拓荒者或馬刺等球隊失準，先能夠爭入季後賽。火箭今場遇上要爭奪一哥位嘅金塊，有主場之利下首節領先對手9分，但安東尼其後着火，並於第三節領金塊一舉反先。金塊於第四節曾一度領先11分之多，但火箭尾段打出鬥志連番追分，布魯克斯於最後一擊單挑安東尼卡特跳投得分，最終以125比123險勝金塊。

比立斯六犯金塊低首

火箭今場將士用命，多名主將都交到貨，布魯克斯賽後表示：「教練屬意我處理最後一擊，當時隊友幫我拉開其他人，讓我有空位投射，當然我好有信心，一射出已經知道入梗！而今場感覺就好似打緊季後賽一樣。」金塊今場輸波，最關鍵係比立斯六犯離場，最後一擊未能落場防守布魯克斯，令安東尼轟入45分亦徒然。