政府帶頭減薪——公務員薪俸及服務條件常務委員會不久前公布入職薪酬調查，指三十六個學位及相連職系的入職薪金較私人市場高，建議調低兩個薪級點，令大學生入職政府每月最少減薪二千元。「金飯碗」縮水，大學畢業生今後想買元朗樓，睇怕要誠心啲向觀音借庫，同時要死慳死抵，一定要用五元買注六合彩，希望在人間。
講真，無論公僕入職薪級點如何惹爭端，老朽依然堅持來生必打政府工，外面風大雨大，打政府工就是大樹好遮蔭，好命的做了副局長或政治助理，隨口噏泥土都變金粒，無喇喇塞錢入你袋，三萬元人工秒秒鐘變十幾萬元，真係妙不可以醬油！即使冇咁好命，做警員或康文署員工也好，前者久不久當值期間可以出海逍遙勁擦海鮮，杯上杯落幾鬼過癮；後者可以經常被傳媒影到佢哋無所事事，有老鼠過街、食店開派對都唔積極啲去捉。唉！當今私人機構，任何一份工唔做到你手痹口吐白泡嘅都算筍工喇！而打政府工，你遇到「一杯茶、一張報紙看半天」的機率超過一半，大佬，咁嘅時勢，薪未算高卻糧準，奉旨巧妙蛇王，人生苦短，畀咁多壓力自己做乜？
內地啲大學生就十分務實，他們為了考公務員，歷盡千艱萬苦。每年，在千萬就業大軍眼中，公務員是幸福感最強的職業，他們之前要花費大筆金錢惡補試題，考試前三日就要張羅旅館，找不到的，恐防堵車，五、六點鐘就要起床，早餐來不及吃就趕赴試場，其緊張處與高考比，只有過之而無不及。一眾未婚女青年喊出口號：「考不上公務員，就嫁個公務員！」