未入正題之前，功夫茶提提你，如果你身上有回鄉卡，最好攞出嚟睇一睇，如果號碼最後兩個數字係00，問題不大，不過如果變咗01，你大劑嘞，有可能煩不勝煩。

呢嗱，就咁，第一批使用限期為十年嘅回鄉卡係一九九九年發出嘅，過咗二○○九年之後，當然好多人要陸續更換新卡啦，數目以十萬計。照道理講，換卡咪換卡囉，好平常嘅啫，畢竟萬事萬物都會過期，如果你好似英國爛滾球星泰利咁勾義嫂，婚姻提早過期都唔出奇，老婆換老公絕對正常。匪夷所思嘅係，負責發卡同換卡嘅廣東省公安廳神神化化，居然將回鄉卡號碼最後兩個數字一律由舊卡嘅00改為新卡嘅01。

點解要改號碼？官方解釋係話，方便佢哋識別持證人士換過幾多次證喎。呢個理由認真九唔搭八，功夫茶打死都唔信大國崛起嘅內地政府仍然咁落後，今時今日撳一撳電腦，乜嘢紀錄都查到啦，使鬼利用改號碼識別咩！

回鄉卡號碼一改，問題大過你個頭，手尾長過水蛇春。你知啦，對於好多生活喺內地嘅香港人嚟講，回鄉卡就等於身份證，開設銀行戶口靠晒佢，買樓賣樓又靠佢，總之辦理各種各樣手續都靠佢。人哋一睇，咦，你張回鄉卡號碼唔同咗，一定會懷疑你有蠱惑，嚴重嘅仲會報警拉人。

有冇辦法驗明正身呢？辦法唔係話冇，不過好鬼死麻煩。首先要繳交一百五十至二百元向中國旅行社申請一份證明書，證明兩個回鄉卡號碼屬於同一個人，另外又要再畀二千二百至二千五百元委託內地司法部門認可嘅律師做公證，整個過程費時一至兩星期。好嘞，你以為咁就一勞永逸哩咩，大錯特錯喇老友，因為每次公證只供一次使用，下次唔該你由頭到尾再做過驗明正身嘅手續，非常費時失事。

身兼廣東省政協委員嘅工聯會副會長陳有海話喎，近期接獲十多宗查詢及投訴，佢已經向廣東政協反映，希望廣東省公安廳盡快解決問題，不過暫時未有回應。

唉，你話係咪神化？你話係咪唔化？功夫茶嗰張香港身份證，換過Ｎ咁多次，從來冇諗過會改號碼。家陣連手機號碼都可以跟你一世㗎啦，電訊公司換完又換，手機號碼始終不變。好心廣東省公安廳唔好玩啦，必須即刻停止擅改回鄉卡號碼嘅擾民行為，而且有必要諗辦法撥亂反正。

話時話，假如你不久將來打算換卡，功夫茶勸你等一等，等廣東省公安廳唔再玩殘港人先至換。等到幾時？呢層就真係答你唔到，不過大家可以放心，回鄉卡改號碼嘅苦主一定包括曾蔭權政府一眾高官，呢班老爺奶奶為民請命就話懶懶閒啫，一旦要向內地部門為自己幸福打拚，肯定會有前冇後打死罷就！