今日係大年初一，功夫茶恭祝各位讀者萬事勝意、心想事成，有情人甜甜蜜蜜、長長久久。可惜今年有啲遺憾，九巴奪命車禍令到十九個大好家庭無法團圓，六十幾名傷者痛苦度日，連煙花匯演都要取消，你話出入平安係幾咁重要吖。
尋日立法會交通事務委員會就呢單奪命車禍舉行特別會議，多名高官及九巴高層出席，喺議員窮追猛打之下，九巴代表不認不認還須認，終於承認兼職車長冇實戰經驗就要上陣，好似嗰位肇禍兼職車長咁吖，都係以「派紙仔」形式跟過吓車咋，冇親自駕駛該路線就要正式揸巴士，加上懷疑不良駕駛態度，終於闖下彌天大禍。所以話啫，呢場車禍係徹頭徹尾嘅人禍，唔止涉事車長有問題，公司一樣責無旁貸。
即係咁，交通安全，人命關天，唔理你係全職車長定兼職車長，訓練應該一視同仁。但工會早就踢爆，九巴為咗縮皮，近年聘請大量兼職車長，相對全職車長有十八日培訓，兼職車長只需接受兩日培訓就可開工，直情兒戲。試諗吓，同樣揸巴士，同樣載住一車人命，九巴對全職及兼職車長竟然有兩樣培訓，為咗節省成本無所不用其極，同草菅人命有乜分別喎。
呢嗱，九巴都知衰嘞，即時停止聘請兼職車長，兼暫停二百幾名兼職車長職務，總算叫做亡羊補牢，之但係運輸署長期疏於監管，放任自流，呢筆帳又點計先？大家有眼見，巴士公司管理混亂，車長唔係工時過長引致疲勞駕駛，就係兼職車長舢舨充炮艇，再唔係就脫班當食生菜。淨係數月前嘅城巴失事剷上行人路意外咋，造成三死廿幾人傷，明明已經敲響警號，工會又好，乘客又好，紛紛要求當局正視問題，點知官老爺好似借咗聾耳陳隻耳咁聽而不聞，結果更慘烈嘅事故又告上演。「官不殺伯仁，伯仁因官而死」，真係冇講錯o架。
仲有喎，家陣運輸署先至話研究喺巴士加裝安全帶，簡直係後知後覺，有冇再遲鈍啲吖。現行法例規定小巴乘客如有安全帶必須佩戴，偏偏巴士乘客獲豁免，擺明攞巴士乘客條命較飛，早就備受詬病。正如有人話齋，連小巴都早已加裝安全帶，有乜理由大巴唔使呀，唔通大巴乘客襟撞啲咩。
如果話，蝴蝶拍翼足以引致一場風暴，咁意外都係一樣嘅咋，背後往往涉及一環又一環嘅人為疏忽，絕對唔係偶然。點都好喇，新年新氣象，唔該港府及各大交通機構醒醒定定，吸取血嘅教訓，修補安全漏洞，千祈咪好了傷疤忘了痛，以為過咗海就係神仙吖。