政府宣傳片教落，「阻塞走火通道，造成生命危險」，估唔到香港郵政明知故犯，分明攞員工條命較飛，而更離譜嘅係，執法部門居然視而不見，見而不理，唔通又係官官相衞玩包庇？
話說香港郵政租用屯門物流中心十樓用作辦公室以及貨倉，被踢爆走廊長期擺放大量雜物。本報記者實地睇過，一出升降機門就發現有大量用雞皮紙包好嘅雜物，堆到成個走廊都係，部分疊到成個人咁高，唔單止佔據一半走廊通道，仲阻擋通往走火通道嘅大門。諗都諗到嘞，萬一發生大火，員工逃生無門，分分鐘一鑊熟都似！
有關注團體就講得啱嘞，《建築物條例》規定行人通道唔可以擺放雜物；《消防（消除火警危險）規例》亦講到明，容許物件阻塞走火通道屬違法行為，橫睇掂睇香港郵政嘅做法都好有問題。好嘞，咁郵政又點解釋呢？佢哋一味死撐，話擺放雜物嘅地方屬於該署租用範圍，現場有足夠走火通道，又話會定期進行安全評核，確保符合職安健及有關法例規定咁話。
香港郵政死不認錯，一副「你吹我唔脹」嘅態度，一啲都唔出奇，事關消防處曾經到場查看，結果不了了之，既然消防處都未出聲，郵政自不然有恃無恐。唔提消防官僚猶自可，一提起真係火都嚟埋，佢哋應做嘅唔做，唔應做嘅亂做，家陣有人擺明違例，佢哋關人個關，反而收到所謂市民投訴就即時踩上傳媒機構，調查為名，滋擾為實，簡直荒天下之大謬！
講番香港郵政，佢哋收買人命已經唔係第一劑。一五年該署外判商被本報踢爆，將郵包堆放到天花板，阻擋灑水系統，消防轆前堆滿雜物，休息室內甚至存放石油氣罐。事實上，九龍中央郵局停車場舊年發生火警，就係因為有人留低煙頭，燒着停車場內雜物導致。仲有吖，九龍灣中央郵件中心之前試過有郵差確診感染退伍軍人症，中心內食水樣本驗出含退伍軍人菌，該署夠膽死隱瞞疫情，搞到人心惶惶，都唔知係咪存心靠害。
話時話，香港郵政醜聞多多，呢啲只係冰山一角咋。早排有郵政合約員工大控訴，指有部門主管涉嫌歧視殘疾員工，取笑兔唇同事，又無故指摘聽障員工犯錯兼逼人辭職。員工返工搵命博不特止，仲要賠上尊嚴，你話係咪該煨吖！
員工係企業最重要嘅資產，呢個係管理學上嘅ABC。香港郵政視員工性命如草芥，不如早啲摺埋好過。反正該署不務正業，「失信於民」多過食飯，反而打壓傳媒劣迹斑斑，同消防一擔擔，繼續存在咪盞浪費納稅人米飯！