反對派冇嘢叻，最叻寬己嚴人，雙重標準，面皮仲厚過犀牛皮。呢，捲入僭建風波嘅律政司司長鄭若驊尋日上立法會接受質詢，反對派自然唔放過呢個大好機會做騷，個個如狼似虎插到鄭若驊一戙都冇，偏偏對於同樣涉及僭建嘅自己友毛孟靜就聲都唔聲，簡直唔知醜字點寫。
係人都知，人稱「盲毛」嘅毛孟靜位於淺水灣道嘅寓所八年前已被踢爆「車房變住宅」，原來係開放式車房被加建圍牆及門窗密封，變成住宅嘅一部分，性質同當年唐唐僭建地下唐宮、鄭若驊僭建天台地庫冇乜分別，但有樣嘢叫「同人唔同命，同遮唔同柄」，高官一個二個因為僭建萬箭穿心，盲毛就依然風流快活，唔到你唔服o架。
嗱，尋日反對派起勢咁插鄭若驊之際，部分心水清嘅建制派議員亦趁着執法部門阿頭列席，質問當局點解唔對盲毛執法，點知唔問猶自可，一問把幾火，發展局局長黃偉綸同埋政制及內地事務局局長聶德權好似人肉錄音機上身咁款，不停重複話政府部門本着不偏不倚嘅精神去處理有關事宜，唔會因為涉事人身份而有所影響喎。喂，唔好當人盲吖，實情係點大家有眼見，盲毛違規八年都冇政府部門執法，一樣僭建兩樣處理，叫人點心服口服呀。
再聽吓屋宇署同地政總署點講吖。屋宇署話喎，有關改建與批准圖則及用途不符，但不涉樓宇結構安全，屬豁免審批工程，已發信要求業權人還原喎，擺明輕輕放下喇。地政總署就仲荒謬，話冇證據顯示該車房違反地契條款，即係唔需要執法。嗱嗱嗱，小市民加支伸縮棍晾衫都要「拆無赦」，鄭若驊僭建就敲鑼打鼓入屋調查揸正嚟做，偏偏盲毛車房變住宅就冇問題，乜嘢叫官字兩個口，乜嘢叫法律面前人人不平等，大家睇到喇。
真係諗極唔明，盲毛身為立法會議員，知法犯法理應罪加一等，佢本人厚顏無恥唔使講，點知執法部門竟然隻眼開隻眼閉，有法不依，擺明偏幫包庇。一個巴掌拍不響，如果話反對派玩特權係破壞法治，咁港府姑息養奸，助紂為虐，對法治影響更惡劣，簡直係罪無可恕。呢嗱，日前有傳媒獨家獲得鄭若驊僭建地庫嘅內部圖片，正所謂冇鬼唔死得人，當中有冇古怪，心照喇。
冇計嘞，香港話就話係法治之區，實情係法外有法，一地兩法，反對派永遠係獲得優待嘅一方。梗係喇，港府不嬲恐洋懼外，內部又充斥無間道，當局唔怕咗條毛至奇。所以話啫，攘外必先安內，再唔從洋奴漢奸手上奪回刀把子部門話事權，香港想有運行都幾難！