相傳大漢奸吳三桂遺言只有簡單兩個字︰「何苦」。意思係後悔引清兵入關，搞到身敗名裂，遺臭萬年，早知今日，何必當初。估唔到今時今日香港地黑白顛倒、人妖不分，慨嘆「早知今日，何必當初」嘅唔再係洋奴漢奸，而係愛國愛港嘅仁人義士，你話呢個係咩世道？
呢嗱，聽吓退休警司朱經緯之前喺庭上點講喇。佢話，如果早知執勤搞到要上法庭，當初就寧願由得班鳩嗚友佔馬路，再唔係索性向上頭申請豁免參與反佔中行動算數。
正所謂有早知，冇乞兒，要怪就怪自己覺悟得太遲！早知執法執到食皇家飯，下次見到班搞事者，梗係第一時間掉番轉頭自認矮仔，自打嘴巴，叩頭認錯；而為求自保，萬一下次再爆多鑊佔中，警察唔單止應該翹埋雙手，剝花生睇好戲，更加應該主動加入黃絲陣營，約埋一齊搞事，再唔係好似《國產凌凌漆》裏面執行槍決嘅公安咁，同個犯老友鬼鬼，一齊煲煙，亦係唔錯嘅選擇。
特別係七警吖，如果佢哋勤讀歷史，今次就唔會衰衝動。須知古人成就大事必須忍辱負重，韓信承受胯下之辱，勾踐臥薪嘗膽，成就不世功業，就係最佳模範。警察莫講話畀示威者淋不明液體，就算兜口兜面畀人吐口水潑尿，都應該唾面自乾。再講吖，同搞事黃絲Friend過打Band，話唔定學似「雙學三子」咁，畀洋人睇中，一個唔覺意獲提名諾貝爾和平獎，前途直頭無可限量！
相約佔中可保平安，功夫茶絕對唔係講笑咁講。七十九日違法佔中搞到香港幾乎萬劫不復，點知三年過去，至今只有二百零個蝦兵蟹將被落鑊，罪成嘅亦多數輕判了事，反而壹淫媒老闆漢奸黎等大部分佔中搞手至今逍遙法外，毫髮無損。而賴嘢嘅唔係執行職務嘅警察，就係向漢奸黎怒擲豬內臟嘅民間義士，特別係朱Sir，候判期間要喺獄中度過冬至、聖誕、新年同生日，家陣雖然獲准保釋，但過個年都過到有心理陰影，終日提心吊膽，警察按本子辦事居然又拉又鎖，簡直同整個社會作對。「執法變犯法，犯法變合法」，呢啲唔係黑白顛倒、人妖不分又係咩呀？
講嚟講去，只要你同洋奴漢奸針鋒相對，理得你義士定壯士，港英餘孽打壓一樣冇手軟。好似東方咁，多年來遭政府部門輪番上陣滋擾，漢奸黎涉刑恐本報記者，當局不聞不問，正正係因為本報堅持正義，敢於揭露洋奴漢奸嘅禍港惡行！
「愛國愛港粉身碎骨，反中亂港逢凶化吉」，呢個就係今日香港嘅現實寫照，回歸二十年人心愈走愈遠，怪得邊個呢？