未入正題之前，功夫茶想同大家探討吓「夢遺」呢個生理現象。中醫其中一個解釋係「手淫過度」，亦即係話男人應硬時唔硬，應射時唔射，唔應射時亂射，結果咪搞到夢遺一褲都係，咩料都嘥晒。
講到「應硬唔硬」、「應射唔射」，眼前就有個新鮮滾熱辣例子。前幾日英國首相文翠珊訪華，諗住藉中國經貿大單進行「輸血」，刺激經濟兼保住相位，以致被外界揶揄為「乞丐團」。以為有求於人梗係低聲下氣喇，點知事實啱啱相反，唔單止「千古罪人」肥彭行前對香港事務指手畫腳，文大嬸更加喺習大大面前討論所謂「香港問題」，不過你咪理，英國佬仍然輕鬆袋走千億元訂單，真係唔到你唔服。
百幾年前清政府腐朽不堪，英國佬尚且要靠堅船利炮逼中國打開大門，估唔到今時今日居然不費一兵一卒就可以着數攞盡，唔通呢啲就係所謂「中國夢」？中央固然對洋人「硬不起來」，港府對洋奴賣港更加係畏如虎狼。律政司日前以「沒有足夠證據」為藉口，放生壹淫媒老闆漢奸黎及多位收受佢黑金嘅反對派政客，令人再次見識「愛國愛港粉身碎骨，反中亂港逢凶化吉」嘅殘酷現實。呢單畸士送錢同收錢雙方直認不諱，鐵證如山，咁都可以甩身，話港府唔係買外部勢力怕，三歲細路都唔信。
大家有眼見，一方面係漢奸黎及反對派政棍有大大個司法保護傘罩住，特別係漢奸黎，策動違法佔中冇事，恐嚇記者冇事，壹仔賣盤賣唔成，發布訊息過程混亂冇事，連大宅僭建都冇事，另一方面係愛國忠良之士備受打壓，郁啲要拉要鎖，回歸後「香港夢」儼然淪為「香港噩夢」。呢鑊港府縱容黑金操控政治，更無異於昭告外部勢力，以後大可堂而皇之豢養走狗搞亂香港。正如有人形容，家陣點止香港夢淪為噩夢，直頭噩夢變夢遺，一嘢扎醒後驚覺成褲都係杰撻撻，以後都唔知點管治。
最離譜係漢奸黎佔了便宜還賣乖，呢頭港獨政客被DQ，「爛果報」如喪考妣，高呼「法治最黑暗的一天」，嗰頭佢老哥獲律政司放生，曾任海軍情報員嘅洋助手Mark Simon對律政司嘅決定大唱讚歌，話係「很好嘅理性決定」，神又係佢哋鬼又係佢哋；而同一日某國際機構推出嘅全球法治指數，居然無視本港司法不公不正，將香港排到第十六位嘅高位，就直頭係精神污染、輿論污染，睇得多隨時壞腦都似。
點講都好喇，港府姑息縱容黑金禍港，等於打開潘朵拉嘅魔盒，再咁落去，香港遲早好似當年上海咁，淪為殖民主義者嘅冒險樂園，到時港英餘孽同漢奸洋奴共治香港，仲講咩「全面管治權」吖！