科蘭開金口爆笑祝福你
今日大年初一，全力撐本地波嘅《東方體育》祝各位球迷，一「本」萬利、天長「地」久、「波」運亨通！幾句恭賀說話當然滿足唔到大家，所以我哋搵嚟本地球壇嘅超級巨星科蘭，入鄉隨俗着起唐裝衫、唱埋賀年歌同大家拜年！一班傑志隊友亦好識做，花盡心思將「射波‧賀年」二合為一，齊齊將過年熱鬧氣氛帶畀撐本地波嘅你！
初五迎接「貴賓」全北汽車
韓職勁旅全北汽車將於大年初五嘅亞冠盃賽事，喺大球場向傑志「拜年」，為咗好好招待遠道前來嘅「貴賓」，呢支港超「1哥」最近積極準備，好讓對手感受一吓「新年氣氛」！為吸引更多球迷入場，球隊喺新1集《NIKE特約：傑志情報站》傾盡全力宣傳，連巨星科蘭都畀足面，聯同華杜斯及列斯奧一齊着唐裝，齊聲唱起「阿姐」汪明荃同「秋官」鄭少秋嘅賀年名曲《新春頌獻》，爆笑度滿分！想知佢哋唱成點，今集《NIKE特約：傑志情報站》咪錯過！除咗唱賀年歌外，科蘭喺揀揮春環節，揀咗張「學業進步」嚟祝願香港球迷，莫非佢知自己個中文譯名叫「科科都難」，成為「考試剋星」？
藍鳥眾將大歎應節糕點
不過，講到氹球迷，又點會冇費蘭度呢？佢仲搵嚟唐建文、林恩許、盧均宜、黃洋同金東進一齊玩射門小遊戲，並且要讀出自己射中嘅賀詞，實行「射波兼賀年」！之後佢哋更試食賀年糕點，「最佳男主角」盧均宜顯示隊長風範，親自大餵隊友添！3位外國長大嘅球員全程表現雀躍，睇嚟不但「無懼怕糕、糕、糕」，更即時愛上呢啲傳統食品。節目尾聲自然唔少得球星祝各位新一年「大吉大利」、「身體健康」、「步步高升」！球迷們，記得去東網或傑志官方Fb睇喇！
圖／文：司徒子文、陳焌鏗