喺古代，對國家社稷有重大貢獻嘅功臣貴冑，皇帝會頒發丹書鐵券，亦即係俗稱嘅「免死金牌」。勢估唔到嘅係，到咗今時今日所謂「法治社會」嘅香港，一樣有人手握「免死金牌」橫行無忌，仲要係嗰啲裏通外敵嘅亂臣賊子，簡直吹脹！
呢嗱，好似早排獲終審法院輕判、「雙學三犯」之一嘅黃之鋒咁吖，佢尋日出席一個電台論壇時，一味堅持自己以「和平非暴力」形式抗爭，並冇暴力傷人，唔明點解之前要被判入獄，唔知嘅仲以為六月飛霜。喂，之鋒哥真懵定扮傻呀？全香港七百萬人見住你哋「雙學三犯」衝擊政總，引爆佔領之亂，咁都有得抵賴？大家話嘞，如果唔係手握丹書鐵券，又點可以咁理曲氣壯！
好在市民眼睛雪亮。正如「東方報業民意調查」顯示，對於作為佔領行動始作俑者嘅雙學三犯獲放生，上訴得直毋須入獄，大部分受訪者狠批係變相縱容違法，香港分分鐘爆多鑊佔中，法治喪鐘已經敲響。
香港地就係咁嘅嘞，愛國愛港粉身碎骨，反中亂港逢凶化吉，七警、朱Sir同埋怒掟漢奸黎豬雜嘅民間義士就話大牢伺候啫，「雙學三犯」獲洋主子力捧，提名競逐諾貝爾和平獎，不知幾威風。黃毛小子何德何能，可以同德蘭修女、聖雄甘地等並駕齊驅？無非係洋主子借佢哋做棋子同中國玩嘢，兼夾獎賞佢哋忠心賣力啫。
當然喇，洋主子對小漢奸們着力栽培之餘，對老漢奸同樣照顧有加。漢奸黎被指黑金操控反對派政客，明明授受雙方直認不諱，鐵證如山，律政司居然以「檢控證據不足」為藉口全部放生。仲有吖，漢奸黎被指係佔中幕後最大黑手及金主、涉嫌刑事恐嚇記者，連大宅僭建都有佢份，惡行厚過本電話簿，卻硬係冇人敢郁佢一條毛，你話唔係好似大部分民調受訪者咁講，港府投鼠忌器、姑息養奸，買咗佢背後嘅外部勢力怕，三歲細路都唔信。
英國哲學家培根講過︰一次唔公正嘅判決，惡果甚於十次犯罪。司法保護傘一而再、再而三向以漢奸黎為首嘅老嫩洋奴賣港賊傾斜，香港「法治之都」金漆招牌可以係咁先。法治淪喪仲係其次，以後黑金政治合法化，外部勢力可以堂而皇之插手干預香港事務，甚至策動顏色革命，嗰度先至攞命。
始終都係嗰句︰蒼蠅不叮無縫的蛋。正如有學者話齋，一個國家連內部事務都處理唔好，鄰居就唔會怕你，亦唔會尊重你。中央再唔喺對港政策上撥亂反正，端正主人公心態，周邊地區從此多事，到時莫講話落實「全面管治權」，分分鐘連「中國夢」都一場空吖。