港府庫房水浸眼眉，肥到着唔到襪，今個月底公布嘅財政預算案會唔會開倉濟貧，仲要睇過至知，之但係港府善財難捨，冤枉甘心就係人都知，淨係大型基建呢度唔見十幾億，嗰度唔見十幾億，真係識印銀紙都唔掂！
西九文化區就係最典型例子。西九文化管理局尋日向立法會表示，一八至一九財政年度會有約三億港元營運赤字，之後兩年分別增加到六億多及七億多港元，三年赤字合計十七億港元。民政事務局高官更爆定響口，預計十年內西九文化區都冇可能達到收支平衡，都咪話唔得人驚。
正如立法會議員質疑，西九已經淪為財政無底深洞，整個項目最終「埋單」要幾多錢，當局有必要交代清楚，咁又係吖，管理局問攞錢時托塔都應承，到唔夠錢使時奉旨藉口多多。西九文化區管理局董事局主席唐英年係咁講嘅，文化區前期工程主要興建戲曲中心等同文化相關嘅設施；而作為穩定經常收入來源嘅餐飲及零售設施租金收入又未有着落，無法彌補營運赤字。唐唐早排同記者講得仲白，佢話西九部分文藝項目係「敗家仔」嘅使錢項目，要以商業及地產項目資助公共項目咁話。
咁就好笑嘞，文化設施先於商業設施落成，又唔係今日至知，分明冇嘢賴搵嘢嚟賴啫。大家淨係見到，西九靚地養蚊養足十幾年，市民未見官先打三十大板，淨係請鬼佬CEO都唔知花咗幾多冤枉錢。好嘞，家陣納稅人洗濕咗個頭，管理局打死狗講價，明知問立法會攞錢難過登天，於是乎心生一計，虎視眈眈謀住酒店、住宅等項目發展權，又話考慮未來幾年分批發行債券。係人都知，當年港府設計西九時，就係將地產及文化項目打包畀單一發展商，被質疑官商勾結而被迫推倒重來，依家又走回頭路，難免令人質疑西九到底係商業資助文化，抑或係文化包裝商業，到時候拗到天光都未拗完。
當然，話又要講番轉頭，唐唐嘅文藝項目「敗家仔」論，恰好反證港府無咁大個頭戴咁大頂帽，明知香港冇咁嘅文化土壤，偏偏要附庸風雅，結果錢就使咗一大筆，「世界級文化樞紐」連影都未見，「世界級笑話」反而長鬧長有。查實文化嘅嘢雅俗共賞，唔一定要走「精英路線」，例如澳洲悉尼達令港布朗格魯保護區咁，發展以土著文化及保育為主題嘅保育區，唔單止為市民提供表演、健身及休憩場地，仲帶旺成個旅遊業，證明呢個世上從冇「敗家」嘅文化項目，而只有無能嘅官僚！
所以話啫，與其公帑繼續倒落鹹水海養大棚廢柴，不如將西九開放畀市民休閒冇咁嬲！