冬季流感疫情仲未見頂，為截斷傳播鏈，港府唔止拿拿聲宣布幼稚園及小學停課，仲不斷呼籲市民接種流感疫苗。可惜吖，港府做幾多防疫措施都好，都唔夠一個不實訊息嘅威力驚人，一傳十、十傳百，唔少人信到十足十o架。
係咁嘅，有女歌星近日喺私人群組發表「高見」，言之鑿鑿話打流感針冇用，事關疫苗只係科學家好似估大細咁製造出嚟，防疫力只有一成，而且疫苗用雞隻培植，含有動物DNA，加上載體含有鋁及水銀，接種疫苗反而會加強病毒變種同社區爆發喎。嘩，唱歌佢就叻啫，幾時做埋醫學專家呀？
咪以為呢啲咁荒謬嘅言論冇人信喎，呢段錄音一經手機通訊軟件散播，好快就傳到街知巷聞，唔少家長信以為真，逼到袁國勇、何栢良等權威專家、食衞局局長陳肇始同埋多個西醫組織急急澄清，直指有關言論「完全錯誤」、「無知」、「荒唐」。「女神」亂噏當秘笈，呢鋪真係唔衰攞嚟衰咯。
嗱，聽吓真正嘅專家點講喇。香港現時使用嘅流感疫苗均為滅活流感疫苗，疫苗內並無活病毒，接種後唔會引致感染流感病毒，更唔會傳播變種病毒。而流感疫苗內含卵清蛋白，即係雞蛋白質，唔係雞，並無動物DNA，亦不含水銀及鋁成分，而且疫苗效力有五成，仍然係最有效預防流感嘅方法，呼籲市民放心接種。
睇吓數據都知啦，家陣嘅兒童流感嚴重個案，九成冇接種疫苗，間接印證疫苗有效，所以話啫，知少少扮代表，隨時害死人嘅咋。話時話，當年沙士肆虐，網上亦一度瘋傳香港被世衞組織列為疫埠嘅假消息，搞到人心惶惶，造謠者到底有乜嘢居心，真係佢自己至知咯。
不過講到尾，都係港府唔爭氣。莫講話當局宣傳不力，搞到市民對流感疫苗資訊一知半解，容易造成誤會及恐慌，「往績」令人冇信心先至最難頂。好似世衞去年底公布今年南半球流感疫苗配方，竟然同香港已訂購嘅四十六萬劑北半球配方唔同，即係缺乏針對性，家陣流感大爆發，你話同港府入錯貨無關，搵鬼信咯。仲有喎，周一嶽出任食衞局局長嗰陣，豪買三百萬劑豬流感疫苗而冇向市民宣傳，結果用咗唔夠二十萬劑，其餘當垃圾銷毀，諗起都眼冤，而且類似事例不勝枚舉，早兩年先至有兩千幾劑兒童十三價肺炎球菌疫苗擺到過期被棄用，問你服未。
睇到喇，人必自侮而後人侮之。港府做嘢錯漏百出，公信力蕩然無存，搞到唔少市民寧願信歌星仔講嘢都唔信港產官僚，你話係幾咁諷刺，又係幾咁悲哀吖！