香港地話就話係購物天堂，但其實陷阱處處，消費者稍一不慎分分鐘荷包大出血。第樣唔使講，淨係預繳式消費引發嘅問題，多到三日數唔完，特別係重災區嘅健身中心，簡直係長爆長有。
呢嗱，話口未完又嚟喇！話說位於旺角嘅TF GYM健身中心，尋日朝早突然喺店外張貼通告，話因為法律問題，即日起暫停營業，好多顧客上到去至發現摸門釘，大感無奈，有顧客喺一六年California FITNESS執笠後轉投依家呢間，點知連環兩鑊「中頭獎」，可以話行衰運行到落腳趾尾，最慘係預繳三年會費，使咗超過一萬銀，家陣會期仲剩番一年半，都唔知點算好。有業內人士估計，該健身中心有二千至三千名會員，相信類似苦主仲有好多。
最離譜嘅係，據聞涉事健身中心今年初仲積極拉客，其中一個「優惠」正正係介紹新人入會可享受折扣，都唔知係咪想刮埋最後一筆。即係咁，部分健身中心推銷手法一向為人所詬病，有職員為咗追單，連智障人士都唔放過，至於將啲客困喺房死磨硬纏甚至偷偷碌對方信用卡等醜聞，更加係層出不窮，惡劣程度同無良美容院絕對不遑多讓。
至於今次涉事嘅健身中心，有超過三十年歷史，業內名聲算係唔錯，好多顧客就係貪佢老字號至揀嚟幫襯，點不知老字號到頭嚟都係靠唔住，簡直防不勝防。話時話，好多健身公司為留住長期客，提供嘅套票服務次數愈多，期限愈長，提供嘅折扣愈多，對一眾有恒常Keep Fit習慣嘅「健身達人」嚟講，又的確幾有吸引力。
當然喇，咁講並唔代表類似消費陷阱無可避免。最簡單係效法旅遊業議會，向消費者徵收印花稅，設立賠償基金；又或者效法外國做法，要求營運者將預繳服務所得款項存入指定戶口，再透過監察該戶口的資金流動情況，及早發現結業危機。再唔係可以考慮設立預繳上限，就算商戶倒閉，消費者都唔使蝕得咁甘。
針對上述建議，最理想梗係由官府落實推動，之但係大家有眼見，多年嚟一直有健身中心突然結業，要求當局介入監管嘅聲音此起彼落，弊在港府官僚作風，加上業界壓力，規管一味軟手軟腳，儼如無牙老虎，旨意官老爺把關，盞嘥氣嘅啫！
功夫茶喺度亦都奉勸美容健身業界，為人為己，都要加強業內自我監管，雖然成本可能高啲，但只要消費者使錢使得安心咯喎，整個行業塊餅自然愈做愈大，一家便宜兩家着，何樂而不為！