最近比特幣炒風熾熱，唔少好此道者炒個不亦樂乎，點知咁就淪為南亞兵團嘅獵物嘞。日前發生嘅比特幣搶劫案，大拿拿一百四十萬元巨款被三名南亞僱傭兵當街撳住搶，狼死程度比當年嘅省港旗兵有過之而無不及，問你死未。
話南亞兵團仲狼死過省港旗兵，一啲都冇誇張，省港旗兵主要打劫金舖食大茶飯，南亞兵團就唔同玩法，大鑊嘢固然來者不拒，細雞嘢亦一樣有殺錯冇放過，殺人放火販毒劈友樣樣齊，甚至連良家婦女都要淫辱一番，少少人性都冇。講番今次單劫案，三名南亞匪擺明受僱做僱傭兵，幕後老闆以出售比特幣為名，引誘買家攜巨款交收時犯案。仲有呀，呢班僱傭兵唔止蒙晒面，而且幾吓手勢就得米逃遁，明顯經驗老到，話背後冇黑幫操縱，邊個信吖。
即係咁，本地黑幫貪南亞兵團膽正命平，南亞兵團貪有快錢可搵，雙方臭味相投，一拍即合，當有人需要南亞兵做嘢，黑幫仲可以做埋「人力中介」層層外判，想搵幕後黑手難如登天，香港有乜法子唔淪為犯罪天堂吖。
講真，南亞僱傭兵爆大鑊已經唔係第一次，淨係舊年已有兩單珠寶店巨劫案由南亞匪包辦，仲要到家陣都未破案。梗係喇，南亞兵團個個眼深鼻高，千人一面，單係認人已十分困難，再加上假難民居無定所，社交圈子隱密，除非有人篤灰，否則警方想破案都幾難。聽聞警方對呢個情況都好擔心，正設法截斷本地黑幫向南亞兵團埋手嘅渠道，但講就容易咯，只要港府繼續效婦人之仁，中門大開，警方想完全阻止南亞兵團犯罪，真係唔使旨意。
唔係咩，港府死都唔肯退出國際公約，連重設禁閉營都諸多推搪，淨係一味增加人手及資源加快審批免遣返聲請喎，以有涯隨無涯，蚊都瞓蛇都死。呢嗱，話口未完啫，又有兩名南亞聲請漢涉販毒受審，其中一人為咗減刑，竟然話要放棄免遣返聲請喎。唔係吖嘛，酷刑聲請竟然成為求情減刑嘅理由，真正係天下奇聞，有關制度被濫用到乜嘢程度，大家心照喇！
一句講晒，喺南亞兵團眼中，香港簡直遍地黃金，既可藉着聲請身份攞津貼甚至呃人道賠償，行街紙到手又可以打黑工甚至作奸犯科，港府年年用十幾億公帑養假難民呢個大毒瘤，結果多謝冇句，反而搞到香港雞毛鴨血，民怨沸騰，試問全世界有邊個政府好似港府咁戇居o架？當高舉人權大旗嘅歐洲都要收緊難民政策，港府仲樂此不疲做冤大頭，官蠢無藥醫就係咁解。