正所謂，錢唔係萬能，但冇錢就萬萬不能。尤其係反對派政客，一年打幾十場官司閒閒哋，少個崩都唔得掂，弊在外部勢力自顧不暇，最大金主漢奸黎同樣自身難保，搞到要賣仔套現救亡，反對派唔自己諗計撲水，乾塘都似。
嗱，講到搵錢撲水呢家嘢咯喎，反對派就最耍家。近年佢哋係又吹雞遊行，唔係又吹雞遊行，就算得小貓三幾隻響應，示威淪為示弱都在所不計。梗係啦，搞親遊行都可以趁機籌款，咁大條財路佢哋點會錯過吖。最常用手段，就係喺遊行沿線設街站叫人捐款，之但係咁做必須向民政事務局申請許可證。有人查過，最近五年當局共批出十六個許可證，但當中獲批嘅非慈善性質籌款活動並不包括公眾集會及遊行，換言之，反對派無牌非法籌款，拉得喇。
咁當然，反對派有好多藉口嘅，有時候佢哋會掛羊頭賣狗肉，以出售紀念品為名沿途籌款，咁就要向食環署申請臨時小販牌嘞。不過食環署都係懵盛盛嘅咋，淨係話部分申請獲批，部分唔獲批，講完等於冇講，問你服未。
即係咁，政黨無牌擺賣或籌款擺明觸犯法例，點解當局唔執法先？民政事務局話喎，冇呢方面嘅數字統計，但無牌進行非慈善用途籌款，最高可處罰款五百元或監禁三個月，市民如有懷疑可向警方舉報。吓，靠市民舉報？莫講話罰款五舊水毫無阻嚇力，過去即使有市民報警，警方大都係勸喻了事，反對派好似有免死金牌咁款，有邊一次真係拉人封艇o架？最難頂係，平時食環署對住執紙皮變賣嘅公公婆婆一律「殺無赦」，票控絕不手軟，但對住反對派無牌擺賣就即刻變咗鵪鶉，欺善怕惡成咁，畀人鬧係港產城管就係咁解。
所以話啫，一個巴掌拍唔響，反對派之所以有恃無恐，全賴港府輸送特權，乜嘢法律面前人人平等喎，咪呃人喇。好似僭建咁大件事，反對派一樣唔使上身，由毛孟靜到漢奸黎再到司馬文無一例外，其他人唔恨得咁多。仲有喎，就算上到法庭，反對派一樣獲放生，長毛黑金「袋住先」被判無罪就係鮮明例子。咁就唔怪得李卓人嘅職工盟，連市民捐畀海麗邨清潔工嘅款項都夠膽死袋住先喇。
都係古人講得啱，世不患無法，而患無必行之法。有人話香港未有《政黨法》，所以吹反對派唔脹，計功夫茶話齋，呢啲都係藉口咋，港府有法不依，執法不嚴，就算立一百條法都係嘥氣。