舊陣時香港生活艱難，多戶人家逼埋同一屋簷下，七十二家房客就係咁嚟。殊不知時移勢易，香港人嘅居住環境不但冇改善，反而不斷惡化，睇怕唔使幾耐，又會倒退番七十二家房客嘅時代咯。
不過若以為現代七十二家房客都係基層窮人，咁就太天真嘞。實情係，今時今日嘅劏房戶，相當一部分具備高學歷，甚至係老細級人馬，問你死未。嗱，統計處最新數據顯示，一六年全港有九萬二千多個劏房，近二十一萬人居住，創有調查以來新高不特止，劏房居民人數仲以每年約五個巴仙嘅速度增長。更令人咋舌嘅係，劏房戶之中有逾五千人為經理、行政人員及專業人士，近一成三人具備專上學歷，而且年輕化趨勢明顯，二十五歲以下年輕人佔近三成，如果連四十四歲以下壯年都計算在內，比例仲高達七成添。
睇到喇，以前住劏房嘅多數係低技術低收入人士，家陣居然連經理級人馬都有，反映啲乜？之唔係香港樓價驚人，絕非一般中產能夠負擔，加上公屋供不應求，計分制下年輕人根本唔使旨意上樓，唔住劏房唔通瞓街咩。有行政人員現身說法，之所以選擇劏房，係因為私樓租金實在太昂貴，交得租嚟儲唔到錢，既然置業無望，公屋冇份，不如留番個錢畀仔女讀書好過。
香港就係咁荒謬嘅嘞，一方面樓價愈升愈有，貴極都有人排隊接貨，好似周街都係有錢佬咁款；另一方面貧無立錐之地，私樓買唔起，公屋輪到死，搞到連豬欄雞棚改建嘅劏房都有價有市。最離譜係港府明知房屋問題愈演愈烈，基層市民生活喺水深火熱之中，仲成立埋一個二個委員會吹水唔抹嘴，美其名曰為拓土優次尋求社會共識，實際上得個噏字。家陣房委會又話搞短租計劃，將等候重建嘅公屋空置單位租畀輪候冊家庭，唔係唔好，弊在得兩年貨仔咁大把，單位數量又少，連杯水車薪都談唔上囉。
話時話，劏房戶固然夠晒慘情，其實樓奴一樣唔好得幾多，幾多人死慳死抵節衣縮食就係為咗層樓，供完頭髮都白晒。再睇吓家陣嘅新盤，唔止呎價高到嚇死人，單位面積仲細到嚇死人，一百幾十呎嘅納米樓都夠膽死索價幾百萬，只係高級劏房咋，你話香港人怎一個慘字了得！
搞到今日咁嘅地步，點講都係港府無能。作為世界有數嘅富裕政府，竟然連住屋咁基本嘅人權都滿足唔到市民，簡直係恥辱。環顧全世界，冇一個先進城市好似香港咁悲慘，特衰政府一味嫌貧愛富，懶理基層死活，到底知唔知醜字點寫吖！