經歷超過廿四小時，警方專家終於成功拆除灣仔嘅千磅巨型炸彈，整個過程如臨大敵，又封路又疏散人群，十足十拍戲咁款，好在最終有驚無險咋。可惜吖，對於另一個長期威脅本港安全嘅都市炸彈，港府唔嗲唔吊，無所作為，市民有得震冇得瞓，真係多得班廢官唔少！
冇錯喇，功夫茶講緊嘅之唔係無惡不作嘅假難民兵團囉。呢班瘟神作奸犯科，橫行霸道，香港就嚟畀佢哋搞到陸沉。呢，尋日之嘛，尖沙咀有南亞大漢懷疑恃醉行兇，打到一位大廈女保安爆缸入廠。係人都知，尖沙咀除咗星光大道出名之外，南亞兵團聚居嘅重慶大廈亦係著名「景點」之一。大家有眼見，成個油尖旺近年來畀南亞幫搞到烏煙瘴氣，冧友、搶劫金舖等大鑊嘢爆完一鑊又一鑊，幾乎亂過黎巴嫩。
當然喇，假難民罪案遍地開花，淪陷嘅又點止尖沙咀吖。好似深水埗通州街天橋底咁，假難民搭咗超過二百間「木屋仔」，「南亞村」之名不脛而走，繼之前黑幫公然斬雞頭燒黃紙收o靚後，警方近日再次喺上址搗破一個豪華武器庫。正如「東方報業民意調查」顯示，大部分市民狠批政府對治安毒瘤束手無策，令通州街天橋底淪為無王管地帶。
市民嘅批評絕非無的放矢。通州街天橋底被假難民鵲巢鳩佔，地區人士長期投訴，弊在食環署、路政署、社署等衙門互相推莊扯皮，導致問題積重難返；仲有鄰近北河街、桂林街等「南亞七街」，港島中環蘭桂坊嘅「人間妖域」，新界元朗等區通通畀南亞幫玩晒。試看今日之香港，竟是誰家之天下，再咁落去，市民聽移居返內地都得嘞！
假難民唔單止「攻城掠地」，犯罪更愈來愈暴力，愈來愈有組織，近年以找換店、珠寶店、電子用品貨倉及「運錢專業戶」為目標嘅多宗大茶飯，好多都有南亞兵團份，日前有假賣家收買南亞兇徒，截劫比特幣炒家百幾萬元現金，就係最典型例子。關注團體嘅調查亦發現，本港販賣私煙勾當已被南亞兵團主導，成為同販毒並列嘅主要財政收入來源，問你死未。
正所謂天下熙熙，皆為利來，如果香港唔係遍地黃金，假難民又點會前赴後繼吖。更何況免遣返聲請制度漏洞多多，假難民一紙「行街紙」在手，打黑工、幫黑幫賣命悉隨尊便；加上有所謂人權鬥士同政客幫手，教路點樣鑽司法空子，利用上訴拖延時間，部分法官又「慈悲為懷」送埋路費等佢哋衣錦還鄉，唔仆到嚟都對唔住主人家啦，吓話！
民意昭昭不可違。九成民調受訪者要求港府退出國際難民公約、即時遞解犯案者以及重設禁閉營，官老爺仲唔快啲拆彈？