好風憑借力，送我上青雲。一年一度嘅渣打馬拉松圓滿落幕，今年有六萬多名選手落場參賽，場面壯觀，雖然有選手不適送院，稍為美中不足，但亦無損呢項盛事大放異彩，各位不畏艱辛完成賽事嘅健兒，真係值得畀個讚自己o架。
唔經唔覺，渣馬已經舉辦咗廿二屆，由九七年第一屆只有一千人參加，到家陣變成萬人空巷，同東京馬拉松及波士頓馬拉松齊名嘅金級賽事，愈辦愈有睇頭，愈辦愈有聲色，話係城中盛事就係咁解。香港人亦由過去對運動冷感變得積極，愈來愈多人投入馬拉松運動，正如毛伯伯話齋，「文明其精神，野蠻其體魄」，一個經常做運動嘅人，健康好啲，精神爽啲，學習同工作效率高啲，長遠而言對減輕公營醫療負擔有百利而無一害o架。
睇番今次賽事吖，當中有唔少勵志故事，例如有失明人士第二年完成全馬賽事，話畀人知冇嘢係冇可能；又例如有刀片跑手成功挑戰十公里賽，用行動證明自己身殘志不殘；仲有女健兒原本約定同兄長拍檔參賽，點知兄長不幸過身，最終獨自忍痛完成賽事慰藉兄長在天之靈，令人感動。所以話啫，渣馬雖然係一場比賽，但意義已經超越比賽，成為挑戰自我、磨練意志嘅人生舞台，呢啲咪係香港精神囉。
渣馬盛況空前，唔止係香港品牌，仲係名副其實嘅國際盛事，成功嘅秘密就係在於完全由民間一手一腳策劃，商界贊助，同政府一毫子關係都冇。係呀，睇番港府搞嘅所謂盛事，唔係醜聞多多，就係無聲無息；唔係大球場爛草皮淪為國際笑柄，就係盛事基金畀人上下其手。唔怪得有人話，任何事一旦被無能官僚插手，好事都變壞事，神奇都變腐朽喇。
即係咁，港產官僚成事不足、敗事有餘都算嘞，最令人不齒係每逢有體育盛事舉行，或本港健兒取得國際佳績，即刻撲出嚟沾光，扮到好熱愛運動咁款，但只要望吓港府對運動有幾多投入，就知佢哋不過葉公好龍。淨係起條環島單車徑咋，講咗N年仲係斷橛禾蟲；又好似啟德體育城，唔止十畫未有一撇，上屆政府仲一度想推倒計劃改為地產項目添，呢啲咪係證據囉。
其實體育賽事搞得好，既可提升國際地位，又可以帶動經濟收益，單係紐約馬拉松，每年賽事最少帶來二十多億港元收入，至於奧運、世界盃呢啲全球盛事更加不在話下，睇吓各地爭相舉辦就知喇。可惜吖，港產官僚出名無能兼鼠目寸光，淨係識做一日和尚敲一日鐘，連經濟民生都搞得一團糟，同佢哋講體育喎，盞嘥氣嘅啫！