特衰政府一向奉行「少做少錯，唔做唔錯」嘅哲學，好似實行十多年嘅社福機構整筆撥款制度咁，政府以為畀咗舊錢出去就萬事大吉，對於公帑係咪用得其所，機構帳目係咪清清楚楚，一概關人個關，結果咪搞到亂象叢生囉！
社工組織翻查多個機構最近三年嘅財務報告，發現「其他開支」項目下嘅「雜項」使費，亂過亂世佳人，有啲機構「雜項」使費佔整個「其他開支」比例高達兩成，部分更佔總營運開支一成幾，比正常情況下雜項佔公司總營運開支百分之四至五，高出一大截，話其中冇蠱惑都冇人信。業界人士講得啱，「雜項」有機會成為「灰色地帶」，機構將撥款用於非資助項目，並隱藏喺「雜項」內而神不知鬼不覺，公帑容乜易淪為私人提款機o架！
講真，社福機構整筆撥款問題多多，呢啲只係冰山一角咋。審計報告舊年就曾批評過有關制度嘅多宗罪，帳目混亂者有之，高層大花筒者有之，服務單位時數不足有之，社署批撥款統統大開綠燈，你話班官係咪食塞米吖！
當年港府實行「整筆過撥款」制度，講就講得好聽，話可以增加社福機構嘅自主以及管理彈性，唔使吓吓實報實銷，再由政府衙門逐層審批咁僵化，實際上由於監管缺位，部分機構高層以靈活調配資源為名，行「肥上瘦下」之實，每年印印腳(逗)巨額津貼嘅同時，前線員工薪水壓得就壓；特別係政府容許機構保留四分之一撥款作為財政儲備，更被部分機構當作私人小金庫，管理層為咗可以喺「儲備」支取花紅，不惜犧牲服務質素以節省必不可少嘅開支，到頭來受害嘅又係市民。
有辦你睇，鄰舍輔導會高層舊年因為「計錯數」，幾年來(逗)多咗花紅導致爆煲，結果佢哋好學唔學學埋晒國泰航空啲衰嘢，自己失誤由前線孭鑊，一度計劃大裁員。歸根究柢，如果社署官僚畀多幾錢肉緊睇實盤數，又點會搞成咁吖！
一句講晒，整筆過撥款目的唔係增加服務靈活性，只係為慳錢同埋卸責，咁多年來冇考慮服務增加等其他因素而作出調整，喺「資源封頂，服務包底」嘅壓力下，就算社福機構作風正派，都要千方百計進行瘦身，社工「減薪加辛」，士氣低落，想唔出事都難。
始作俑者，其無後乎！當年力推整筆撥款制度嘅，就係自言以做社署署長為榮嘅林鄭月娥，同埋時任社福界議員、依家貴為局長嘅羅致光，市民真係多得佢哋唔少。當然喇，今是昨非，永冇話遲，港府家陣話要檢討制度，唔該唔好得個噏字！