近年香港刮起一片麻辣米線熱潮，當中一間知名連鎖食肆仲因為被日本飲食集團收購而成為一時佳話添。不過咁，麻辣米線好食係好食嘞，弊在鈉含量爆燈，食得多因住病從口入吖。
嗱，消委會連同食安中心測試本地食肆一百款非預先包裝亞洲風味湯粉麵鈉含量，赫然發現七十六款嘅鈉含量超出世衞標準，超標最嚴重嘅一款腩肉墨丸麻辣米線，連湯飲埋鈉含量足足有六千毫克，即係超過世衞建議成年人每日攝取上限二千毫克嘅兩倍，問你死未。
至於廣受港人歡迎嘅一家米線連鎖店，一碗墨魚腩肉麻辣米線鈉含量亦高達三千九百毫克，超標近一倍，就算唔飲湯齋食麵一樣超標三分之一。仲有喎，「夜鬼」至愛嘅杯麵同碗麵一樣鈉含量極高，食一碗已接近每日攝取上限，都咪話唔得人驚。正如醫生話齋，吸收過多鈉會引致高血壓，好傷身o架。
歌都有得唱喇，「愈美麗的東西愈不可碰」，食物愈香口愈美味愈唔健康，真係冇講錯o架。市民食埋咁多「三高」食品，唔止增加健康風險，仲會增加公營醫療負荷，港府為咗市民健康着想又好，為咗慳錢都好，實在有必要提高市民健康飲食意識，仲要採取配套措施。呢嗱，前朝政府咪煞有介事成立「降低食物中鹽和糖委員會」嘅，當時仲因為委員會個名又長又蹺口，畀人笑到面黃，之但係成立至今三年嘞，首屆任期亦即將於下月結束嘞，到底做過啲乜先？
好對唔住，呢個委員會咁耐以來嘅唯一「政績」，就係上年底推出「低鹽」、「無鹽」、「低糖」、「無糖」標籤供預先包裝食品使用，話就話協助市民選購較健康食品，實際上措施只係自願性質，業界跟又得唔跟又得，即係嘥氣。連部分委員都承認委員會人數太多，開會太少，冇乜實質貢獻，與其話港府決心規管食物中嘅鹽和糖，不如話有姿勢冇實際好過。
世界變嘞，以前啲人追求食得是福，依家追求食得健康，隨着社會知識水平不斷提高，市民都知道「三高」係萬惡之源，加上運動量不足，好多心血管疾病甚至癌症都係由此而來，所以政府加強規管食物成分，可以話係當務之急。
呢，農曆新年就快到，飲飲食食唔少得，食得多唔止好易滯、好易肥，仲好易病添。外國唔少地方強制商家必須列出食品成分資料，就連買杯咖啡都要列明卡路里有幾高，反觀港府一味怕商界反彈，乜都唔敢做，以為求其成立個委員會就可以敷衍輿論，結果一事無成，你話係咪靠害吖。