大家收到來歷不明推銷電話嘅時候，如無意外都會不期然產生兩個反應。第一個反應係：「邊個咁鬼煩？」第二個反應係：「邊個出賣我？」
冇錯，推銷電話確係令人不勝其煩，煩過兜口兜面繞住你耳邊飛來飛去嘅烏蠅，亦煩過千篇一律重重複複嘅人肉錄音機。問題係，好多時候你真係唔知邊個將閣下嘅個人資料大賤賣，導致三唔識七嘅陌生人不斷侵犯你嘅私隱線。
呢嗱嗱嗱，家陣又捉到兩個將香港人賣豬仔咁賣嘅不法分子。個人資料私隱專員公署譴責，「香港預防協會有限公司」過去兩年透過電話推廣活動，以誤導甚至近似欺詐嘅手法，訛稱響應全民醫療體檢計劃，收集咗三十六萬名市民嘅姓名、性別、電話號碼以及住址等等資料，聲稱登記就可以享用免費身體檢查。有市民登記之後收到「翔滙保險策劃有限公司」嘅迎新信，先至知道原來預防協會將個人資料轉移畀保險公司。
私隱專員就批評嘞，預防協會以不公平手法收集個人資料，如果喺四月一日新私隱條例生效之後發生，預防協會可能已經觸犯條例，有機會被判罰款或者監禁。所以咯喎，專員要求翔匯保險喺九月三十日前銷毀所有預防協會提供嘅個人資料。簡單咁講，兩間公司罔顧法紀，所作所為不負責任。
表面上睇，私隱專員蔣任宏做番一齣好戲，捉到兩間賣豬仔嘅公司，之但係實際上香港人嘅私隱線並未得到全面保障，仍然有可能日日夜夜受到疲勞轟炸。冇錯，新私隱條例已於四月一日生效，可惜呢一條法例存在漏洞，商業機構仍然有辦法鑽法律罅。
即係咁，新私隱條例設有「不溯既往安排」，只要符合三項條件，商業機構毋須重新通知以及取得當事人同意，照樣可以發放直銷訊息，三項條件包括：新例生效前曾通知直銷對象收集同使用資料嘅目的，曾向直銷對象進行相關直銷活動，當事人從無拒絕相關直銷活動。既然條例存在漏洞，無良機構趁條例生效前向客戶發信表明會以佢哋個人資料作為直銷之用，博你唔反對當同意。
喂，新私隱條例名義上保障個人資料，實際上變相默許商業機構繼續滋擾港男港女，唔啱數啫！
計功夫茶話齋，蔣任宏千祈唔好沾沾自喜，捉到兩間販賣個人資料嘅無良公司不代表革命成功。私隱線神聖不可侵犯，個人資料寸土不讓，絕對唔容許好似釣魚島咁樣淪陷於外人魔爪。蔣任宏必須拿出蔣介石抗日嘅決心，將所有賣豬仔嘅不法分子趕盡殺絕！