有人話，人類嘅歷史就係不斷重複錯誤，真係冇講錯o架。呢，沙士慘劇啱啱過咗十周年，中東嘅新沙士威脅仲未解除，內地又爆發變種禽流感，一疫未平一疫又起，問你怕未。唔係嚇大家，早前唔少地方無端端落雹，被視為不祥之兆，天人感應嘅嘢，有時唔到你唔信o架。
今次禽流感來勢洶洶，繼之前證實嘅兩死一危個案之後，江蘇又確診四宗病例，而且病情都係危重添。而網上更加係傳聞滿天飛，都唔知究竟邊啲係真，邊啲係假，搞到人心惶惶。其實，真又好，假又好，防疫寧緊勿鬆，面對高致命性嘅變種禽流感，提高警覺，加強防備，係絕對唔會錯嘅。
大家應該仲記得，當年沙士之所以大規模爆發，就係因為中港兩地官僚輕描淡寫，甚至刻意隱瞞，延誤防疫時機，先至搞到雞毛鴨血。經一事長一智，吸取咗上次慘痛教訓，兩地官僚係咪有所長進呢？睇怕都好難咯！
嗱，本報記者直擊唔少港人北上買餸嘅深圳東門菜市場，發現裏面七國咁亂，烏煙瘴氣，根本冇採取任何防疫措施。表面上，檔主落力叫賣冇乜特別，但只要細心觀察，就可以發現部分檔口擺放大小不一嘅鐵籠，裝滿各式野味，箭豬、石貍、鱷龜、活蛇等等，應有盡有，即買即劏，搞到滿地鮮血，腥味撲鼻。仲有吖，唔少家禽檔口出售活雞、鴨、鵝，衞生環境亦唔好得野味檔幾多嘅咋。正如學者話齋，各類野味棲身於唔同環境，帶有唔同病毒，將佢哋放埋一齊，可能出現交叉感染，產生基因洗牌效應，演化出新型變種病毒，隨時好大鑊。
唔係危言聳聽o架，當年沙士就係由野味引起，內地當局其後頒令禁食野味，可惜「好了傷疤忘了痛」，沙士過後，食野味嘅風氣好快就死灰復燃。唉，同胞死性不改，官僚闊佬懶理，病毒蓄勢待發，唔出事至奇喇！
正所謂，城門失火，殃及池魚，內地爆發疫症，香港都幾難獨善其身，尤其港產官僚把關求其，敷衍了事，市民想唔擔心都唔得。根據規定，旅客攜帶鮮雞返港屬違法行為，但記者發現唔少深圳雞販教港人以「拖水」方法攜帶半熟雞過關，結果掂行掂過，毫無阻滯，你話當局究竟點樣把關？食衞局局長高永文仲話已提高警惕，加強入境人士體溫測試添，信佢一成，雙目失明。
無論點都好喇，臨禍忘憂，憂必及之吖。十年前廣州一名教授將沙士病毒傳入香港，最終奪去近三百條人命，今時今日個人遊旅客愈來愈多，危機四伏，變種禽流感隨時乘虛而入，如果港產官僚繼續懶懶閒，隨時害人害己！