官字兩個口，原來屋宇署官僚唔止有兩個口，仲有兩個樣添。好似打擊僭建咁吖，一時闊佬懶理執法不嚴，一時矯枉過正亂告一通，小業主真係畀佢哋玩殘！
話說黃大仙有一座四十幾年嘅唐樓，頂樓四個單位嘅業主○六年突然收到屋宇署嘅清拆令，指四個單位嘅露台係僭建，要馬上清拆喎。本來呢，要求清拆僭建物係啱嘅，問題係業主翻查資料發現，雖然當年售樓圖則顯示單位無露台，但露台的而且確喺大廈落成時已經存在，屋宇署驗過樓無問題至批准發售，依家至話露台有問題要清拆，咁即係老屈啫！
官老爺胡亂執法，業主梗係唔肯就範啦，點知屋宇署一直窮追猛打，早前仲再次票控業主無遵從清拆令添。好嘞，故事講到呢度，大家梗係以為屋宇署實大石責死蟹啦，哈，原來劇情峰迴路轉，其中一名業主日前到觀塘法院應訊前，屋宇署突然撤銷票控，咁即係乜嘢意思吖？即係間接承認執錯法，告錯人囉。
錯就要認，打就企定，屋宇署胡亂執法，隨便告人，撤回票控理所當然啦，令人奇怪嘅係，點解屋宇署今次肯認衰呢？嗱嗱嗱，唔好話港產官僚良心發現洗心革面呀，呢啲嘢無人會相信嘅。正如協助業主嘅區議員質疑，屋宇署只係「睇則做人」，未查證清楚就亂發清拆令同票控業主，甚至可能係當年驗收樓宇時馬虎睇漏眼，多年後發現卻將責任推晒落小業主身上，意圖將露台毀屍滅迹。
唉，官字兩個口，屋宇署官僚其中一個口練精學懶等咬長糧，大家都知道，唔知嘅係原來另一個口係用嚟胡亂執法咬人。喂，如果業主唔係據理力爭，咪食咗一隻大死貓？如果事件無被傳媒揭發，咪有大量業主無辜受屈都唔知？話時話，屋宇署胡亂告人，今次可能只係冰山一角嘅咋，以前唔知幾多無辜市民含冤莫白嘅喇！
所以話啫，港產官僚真係害人不淺㗎。一句撤回票控，講得幾輕鬆呀，可憐業主咁多年嚟畀佢哋搞到心力交瘁，唔止單位無端端被釘契，仲要擔心官司纏身同承受巨大經濟壓力，真係慘情。咁啦，屋宇署官僚如果真係知衰，唔使業主拆露台都未夠o架，自己拆祠堂當賠罪啦！
講開又講吖，如果屋宇署真係咁着緊打擊僭建，點解唔去對付周一嶽呢？早喺上年五月，本報已經踢爆時任食衞局局長嘅周一嶽知法犯法，港島半山豪宅違規用玻璃嵌封露台，圖文並茂，證據確鑿，但係事件拖咗接近一年嘞，僭建物依然原封不動，咁算點先？嗱，知恥近乎勇，如果屋宇署票控周一嶽，唔止唔怕告錯人，仲隨時獲得市民掌聲添，話晒嚴懲昏官，總好過亂告平民吖，係咪？