天降異象顯示不祥之兆，雖然有人話唔係咁可信，不過仍然會帶來客觀存在嘅具體災害。好似湖南長沙咁吖，天降異象包括行雷閃電、暴雨成災以及冰雹襲人，即使最唔迷信嘅人都會見到一個慘烈嘅現實，一名二十一歲女大學生一失足成千古恨，唔小心跌落無井蓋下水道，隨即被湍急嘅水流沖走，至今下落不明，生還機會渺茫。
至於香港嘅天降異象就係三月落雹嘞，啱啱遇着剛剛，早春三月接二連三爆出倫常奪命血案，呢頭有個年輕人涉嫌殺父弒母再碎屍，嗰頭又有另一個年輕人涉嫌殺父傷母。咁都唔止喎，有個富商因為感情轇轕而淪為刀下亡魂，涉嫌殺人者跟手變成自殺死者。三月落雹呢家嘢，你都咪話唔係邪氣逼人。
邪中之邪嘅係，兩個造成血案嘅忤逆仔同樣係社交能力欠佳又終日沉迷打機嘅宅男，話唔定嗜血嘅暴力遊戲係導火線之一。「東方報業民意調查」顯示，對於接連發生涉及年輕人嘅倫常慘劇，四成七受訪者認為青少年問題不容忽視；三成感到社會充滿憤慨令人擔心；一成一更加覺得香港淪為悲情城市。
青少年失業率高企又有冇關係呢？四成一受訪者認為失業令人失去自信心；兩成七歸咎政府冇提供實習機會，對錯焦點；兩成指出，青少年面對畢業等於失業嘅壓力。
雖然話無仇不成父子啫，之不過搞到殺老竇仲要碎屍萬段，年輕人嘅道德觀念都好有問題喎。養不教，父之過，教不嚴，師之惰，香港嘅教育多多少少都要負上一定責任。四成八受訪者就認為嘞，最大問題係忽略道德培養；兩成五覺得資源不足，大學學位少；兩成三不滿副學士認受性低，難找工作。
講開又講吖，若然天降異象真係顯示不祥之兆，功夫茶擔心不祥事件陸續有來。你知啦，時下年輕人好激進o架，唔止反父母，仲會反政府，又會反社會。萬一堪輿學家講得冇錯，三月落雹係民怨滔天嘅警號，日後即使唔係殺父弒母咁殘忍，潛在嘅破壞力都不容輕視。
咦咦咦，咪住先，近日有另一個調查顯示，七成受訪者認為現時香港人係生活於痛苦之中，部分群組嘅痛苦指數更加接近危險警號，最痛苦嘅係住屋問題，其次係物價、貧困、就業、污染以及老化等等。喺咁嘅情況之下，普遍痛苦嘅香港人會唔會做出一發不可收拾嘅反社會行為o架？香港人生活壓力咁大，最大壓力來自樓價租金高昂，一個唔覺意壓力衍生暴力，為人父母者真係有得震冇得瞓。
總而言之，異象已經降臨，警鐘已經響起，麻煩政府想想辦法紓緩住屋問題構成嘅沉重壓力！