如果你參加旅行團出外遊埠歎世界，你會唔會接受導遊嘅面孔天天新款吖？今日係阿珍帶你遊山玩水，明日換咗係阿娟帶你吃喝玩樂，後日又變咗阿明帶你到處購物，嗰種感覺可能令你滿腹牢騷，喂，唔好當團友係孤兒仔至得o架！
冇錯嘞，導遊面孔天天新款真係會畀團友一種唔舒服嘅感覺，事關同遊一個團就好比同坐一條船，大家梗係希望一次生兩次熟同舟共濟o架啦，冇理由每日都有一個唔知乜水打乜水嘅陌生者飾演掌舵人。偏偏香港好多旅行社都做唔到「一團一導遊」嘅規定，帶團嘅導遊好似走馬燈咁轉呀轉，轉到團友眼花繚亂。如果轉到一個性情溫和脾氣好嘅導遊都算嘞，萬一換成倀雞霸道好似阿珍咁惡嘅導遊點算呢？阿珍金句係「你這輩子不還，下輩子也要還出來」，撇開強迫購物嘅問題唔講，嚇到人即時瓜老襯趕去輪迴投胎完成下輩子還債嘅特殊任務，咁就唔好啦。
係呀，香港真係有好多旅行社違規o架，去年至今喎，旅遊業議會查獲超過四十宗旅行社涉嫌違反一團一導遊規定嘅個案，現正等候旅議會轄下規條委員會排期聆訊。
經過規條委員會裁定違規而被罰記分嘅旅行社至今累計有二十八間，如果被記滿三十分就會被取消旅議會會籍。亦即係話，家陣有二十八間旅行社處於「守行為」狀態，一有再犯隨時面對釘牌嘅極刑。最新一宗裁定違規嘅旅行社，三次喺未通知旅議會嘅情況之下更換導遊，規條委員會重罰記二十分。
計功夫茶話齋，好心各大旅行社生生性性啦，一團一導遊嘅規定合情合理啫，經常違規真係唔啱數喎。即使你當團友係孤兒仔，佢哋都需要一個全程跟到足嘅固定奶媽，唔應該將奶媽調來轉去吖嘛。
除咗一團一奶媽……唔係……一導遊嘅規定唔應該違反之外，旅行社嘅待客之道都有必要盡快改善。大家都記得農曆新年期間發生過一單丟人現眼嘅「遊客被迫瞓巴士」嘅醜聞啦，負責接團嘅世通假期居然冇為遊客預訂酒店房間，臨門一腳搞到倒瀉籮蟹，唔瞓巴士就要瞓天橋底。咁樣損毀香港旅遊業聲譽嘅旅行社，唔釘牌都天冇眼啦！
話時話，香港旅遊業確實問題多多，你有你違規，佢有佢劏客，黑店林立之餘配套設施又唔足夠，紮營度宿居然都要爭崩頭。功夫茶想問一問特區政府，旅遊天堂係唔係浪得虛名o架？如果唔想打爛招牌，係唔係應該切實執法打擊業界敗類呀？一於咁話啦，懶官賣懶，賣到年三十晚！