失敗失敗，非常失敗，淫賤黎賣仔大計宣告終極失敗！
壹淫媒出售台灣業務昨日係交易最後限期，不過傾唔埋欄，買家打退堂鼓退出交易，淫賤黎吸水離場嘅如意算盤以爛尾告終。面對壹塌糊塗嘅壹盤爛帳，難得淫賤黎仲有心情搞爛Gag，佢話今次賣唔去，以後永遠都唔會再賣喎。
點解功夫茶認為淫賤黎搞爛Gag呢？原因好簡單，家陣已經唔係賣仔唔賣仔嘅問題，而係變咗執笠唔執笠嘅問題，你話永遠唔會再賣啫，唔代表壹淫媒唔會消失得無影無蹤喎。
係人都知，壹淫媒現時債台高築，銀行負債高達十二億元，現金不足三億，賣仔失敗勢必導致壹淫媒瀕臨破產邊緣。證券分析員就估計嘞，壹淫媒股份復牌之後可能大跌超過五成。喺台灣電視業務繼續巨額虧蝕以及免費報業務瘋狂燒錢嘅情況之下，證券界人士預測，壹淫媒全年虧損可能高達十五億元。
好嘞，依靠舉債度日嘅壹淫媒仲有乜嘢辦法繼續死撐落去呢？賣仔救亡本來係釜底抽薪嘅江湖救急，奈何買家唔願意落疊，救無可救蝕到破產唔通唔執笠咩！
再講吖，就算日後有神仙打救，壹淫媒逃得過執笠厄運，以淫賤黎言而無信嘅固有性格，永遠唔會再賣嘅承諾都係一個爛Gag。喂，記唔記得當年仍然係佐丹奴老闆嘅淫賤黎做過乜嘢呀？朝早誓神劈願話唔會賣佐丹奴股份，點不知即日晚上已經完成配售，佐丹奴股份賣個一乾二淨，咁嘅大話精根本毫無誠信可言。不如咁講啦，淫賤黎最先出賣嘅係自己嘅靈魂，跟住落嚟乜嘢都可以出賣，包括旗下員工嘅福祉。人哋話喎，一日一蘋果，醫生遠離我，不過套用喺爛蘋果身上就唔同嘞，一日一爛果，真相遠離我。
話時話，假如壹淫媒台灣業務真係死路一條邁向執笠嘅窮途末路，對於台灣民眾而言未嘗唔係好事，冇必要受到不良傳媒長期荼毒吖嘛。若然死唔斷氣，功夫茶呼籲台灣官商繼續聯手抵制，一於抵制到壹淫媒斷氣為止。
冇錯，台灣確實存在官商聯手抵制壹淫媒嘅現象，抵制得正氣凜然。反觀香港咯喎，官商聯手包庇就有，尤其係北大人，簡直敵友不分，是非不辨，當年中資銀行提供貸款助壹淫媒上市，依家又容許壹淫媒記者北上採訪，仲向壹淫媒猛咁落廣告，情況就好比養狗咬主人，又好比送子彈畀敵人開槍射自己，諗落都唔知好嬲定好笑。
總而言之，淫賤黎如果靠得住，肥豬乸都會識上樹，以後永遠唔會再賣嘅語言偽術聽完就算，千祈唔好認真，認真你便豬了。即係咁，若然壹淫媒嘅結局係破產執笠，香港少啲烏煙瘴氣，相信好多人會開香檳慶祝o架！