沉魚落雁本來用嚟形容傾國傾城嘅絕色美女，不過家陣如果有人話你知，魚沉了，雁落了，你可能會有另一番毛骨聳然嘅見解：嘩，魚類死得一塌糊塗，鳥類亡得亂七八糟，唔通禽流感H7N9有咁大殺傷力，搞到國家城池一一傾頹？
你都咪話唔得人驚，華東地區嘅禽流感疫情有進一步擴散嘅趨勢，確診病例不斷增加，死亡率維持一個高水平，真係人心惶惶o架。除咗有魚鳥集體死亡嘅離奇現象之外，尤其令人憂心忡忡嘅係，上海黃浦江不停湧現「少年豬之奇幻漂流」，數以萬計乳豬屍體隨波逐流，上游漂呀漂，一直往下流，上海人發覺扭開水龍頭就飲到豬肉湯，飲完肯定眼光光。
嗱，假如閣下係你儂我儂嘅上海人，會唔會將大量死豬同禽流感H7N9混為一談吖嗱？梗係會啦，上海其中一個禽流感病死患者吳亮亮喺二月底發病，當時正值黃浦江漂浮大量奇幻死豬，加上吳亮亮係賣豬肉嘅街市檔販，輿論質疑黃浦江死豬就係H7N9病毒嘅萬惡之源。當然啦，上海官方傳媒矢口否認禽流感同死豬有關，不過因為國產官老爺隱瞞疫情嘅不良紀錄深植人心，所以網民嘅態度係懷疑主義：「官方真的闢謠了，那代表事情真的存在！」
講到呢度，功夫茶有必要舉腳贊成民建聯嘅提議，事關呢一個政黨發起請願，敦促特區政府再籌辦「全城清潔大行動」，策劃官方同民間上下一心聯手搞清潔，防止來勢洶洶嘅疫情禍及自由出入嘅香港。相信大家都記得十年前嘅沙士災難係幾咁悽風慘雨，先係內地瞞疫，繼而患者播疫，跟住全城瘟疫，最後總共二百九十九位港人同胞無辜辜蒙難。就喺十年前，全城清潔大行動出現嘞，呢度洗一洗，嗰度擦一擦，終於守得雲開見月明，額手稱慶逃過一劫嘅生還者放低令人窒息嘅口罩。
喂喂喂，唔好唔記得喎，家陣嘅情況係左右夾攻「雙疫齊飛」，禽流感H7N9之外仲有肆虐中東嘅新沙士，死亡率之高同樣係嚇到你魂飛魄散。換言之，重新籌辦全城清潔大行動絕對係應有之義，冇可能任由香港呢一個危城再次遭逢浩劫。
按照食物及衞生局局長高永文嘅講法，市民要有心理準備，本港有可能出現家禽或人類感染H7N9禽流感個案。既然係咁，全城清潔大行動咪就係最有意義嘅因應之道囉。
十年前嘅清潔大隊長係時任政務司司長嘅貪曾，今次搵邊個揸掃把好呢？一於搵現任政務司司長林鄭月娥啦，斷估林鄭唔會學似貪曾咁樣揸流攤啩！