十二年從未調整過售價嘅《東方日報》，因為紙價及其他成本持續上漲而不得不將售價向上調整一元，四月七日起每份售七元。雖然大家一定認同七元買一份全港銷量冠軍嘅報紙仍然係物超所值，不過功夫茶話畀大家知，東方報業集團唔會滿足於現狀，必定會全力以赴為大家做到更好，報答各位親愛讀者咁多年來嘅鼎力支持。
《東方日報》之所以能夠長期保持全港銷量冠軍嘅頂級位置，原因無他嘅，新聞夠精準吖嘛，內容夠紮實吖嘛，淨係獨家踢爆前特首曾蔭權爵士一連串貪腐醜聞，已經令人拍爛手掌啦，足以證明本報觸覺敏銳又不畏強權。所以咯喎，全力以赴為大家做到更好嘅意思就係話，精準嘅新聞更加精準，紮實嘅內容更加紮實，配合提神醒腦嘅悅目版面，付出七元買一份重量級報紙簡直划算到極。
加強內容嘅具體做法到底係點嘅呢？等功夫茶透露少少啦，譬如話國際版，新設欄目「寰宇奇趣」，為讀者搜羅外國奇人趣事。再譬如兩岸版，增加「打黑打假」欄目，專門揭露內地各式各樣令人髮指嘅黑心勾當，等大家北上公幹或者遊玩之時知所警惕。
B疊財經又有乜嘢新搞作呢？新搞作就多囉，「天財新星」、「產經Monthly」、「生活經濟學」、「財星微訊」、「居屋宅急便」等等等等，功夫茶一口氣真係講唔晒咁多猛料內容，不如簡單啲概括出一個重點，你如果想深入了解樓市以及股市嘅動向走勢，把握投資先機，你就唔能夠唔睇《東方日報》精益求精更加強化嘅財經版囉！
當然，《東方日報》加強內容又點只咁多吖，娛樂、馬經、副刊、體育、男極圈等版面全面改革，全面強化，可以講係精彩紛呈。嗱，功夫茶今日先同大家講吓娛樂版，除咗維持每日娛樂新聞強勢，貫徹精編精寫，仲會進一步美化版面，植入新嘅插圖，為讀者提供耳目一新嘅春天色彩，務求做到人見人愛，花見花開。
仲有個話題，功夫茶平時比較少同大家探討，今日不妨講一講。即係咁，各位無論以前付出六元，定係今日起付出七元買《東方日報》，其實都係間接做善事，幫助有需要人士。道理好簡單，東方報業集團旗下嘅東方日報慈善基金同太陽報愛心基金，一向扶危濟急，咁多年來受助者多不勝數，得到社會一致好評，呢啲全靠讀者支持咋，功夫茶代受助者多謝各位善長仁翁！
一句講晒，《東方日報》一定會百尺竿頭，更進一步，做到更好、更高、更強！