冧橋！冧橋！香港發生回歸以來第一次機場冧橋事件！
大家可能會問，乜赤鱲角機場有橋嘅咩？司空見慣嘅行車天橋以及行人天橋當然冇啦，不過有一種活動式嘅橋，叫做登機橋，作用係接駁機場客運大樓同準備升降嘅飛機。前日傍晚喎，載滿二百六十二名乘客嘅國泰航空班機CX532，準備起飛前往日本名古屋，俗稱「橋手」嘅操作員收回登機橋嘅時候，成條橋突然之間向左翻側墮地毀爛，飛機艙門亦被扯甩。姓葉嘅橋手重傷被困，現場一片混亂。大話夾好彩嘅係，乘客同機組人員已經上機，登機橋上面再冇其他人，否則後果不堪設想。
乘客雖然毫髮無傷，不過行程受到影響。國泰航機由於艙門損毀而無法如期啟程，航班必須改於昨日早上八時三十分起飛，乘客迫於無奈要入住酒店宿一宵。
話就話今次冇乘客遭殃啫，但係成件事都相當恐怖喎。你知啦，機場係進出本地嘅大門口，外國朋友包括國際知名大人物對香港產生嘅第一印象就係機場，一落機若然見到冧橋咁嘅驚險場面，香港乜架都丟清啦。正如旅遊界立法會議員姚思榮話齋，對於今次登機橋倒塌事件感到震驚，擔心影響香港旅遊業形象，促請機管局全面調查以免事故重演。
話時話，香港自從九七回歸以來，真係乜嘢離奇古怪嘅事都發生過，冧橋傷人又有，冧樹殺人又有，甚至乎死人冧樓都有，土瓜灣馬頭圍道唐樓倒塌淪為頹垣敗瓦至今歷歷在目。喂喂喂，升降機都會一落千丈變成跳樓機，你話係咪令人啼笑皆非吖！
點解會咁嘅呢？計功夫茶話齋，回歸之後成個管理系統嘅水平不斷下滑，特區政府由上至下冇做好監管角色，結果咪就係滿目瘡痍囉。回歸之前咯喎，大家唔會諗到東區走廊會移位，獅子山隧道會火燭，港鐵會一次又一次失靈壞車導致乘客怨聲載道。至於回歸之後先至啟用嘅昂坪纜車，唔係半天吊就係索性停駛，證明家陣嘅管理水平真係衰過舊時o架！
仲有又殘又舊又超載嘅紅磡海底隧道，萬一滲水冧到亂七八糟點算呢？
好嘞，睇番今次機場冧橋事件，邊個要負責呀？咪就係機管局囉，而呢一個機管局曾經喺九八年將搬遷不久嘅赤鱲角機場搞到徹底癱瘓，將當時嘅香港雙手奉送畀國際傳媒描寫成天字第一號笑柄。
香港精神一向係港男港女賴以自豪嘅核心價值，之不過咁，大家有冇諗過香港精神都會有滑坡嘅一日？若然特區政府繼續敷衍塞責，任由管理水平谷底橫行，全無莊敬自強改善施政嘅決心，莫講話機場竟然會冧橋，成個政府都有機會冧檔！