限奶冤案拒道歉 海關胡混港蒙羞

弊就弊在原來海關人員矇查查，甚至可以話係懵到上心口，有內地客攜帶不受限制嘅米奶粉即俗稱嘅米糊出境，執法者居然好人當賊辦。有一位來自南京姓黃嘅女遊客，上星期帶四罐米糊離境，香港海關將人哋截停並且檢控。事後食物及衞生局同海關終於認錯，聲稱經過調查發現米糊不受新修訂法例規管，撤銷對黃小姐嘅控罪，而且退還保釋金同被扣留嘅貨物。

慘遭老屈嘅國內同胞得還清白，係咪應該高興呢？錯錯錯，原本寬宏大量勸網民原諒香港海關免傷同胞感情嘅黃小姐，不但唔覺得高興，反而怒火中燒忍唔住破口大罵，因為海關人員唔止冇道歉，仲要黃小姐自費來港領回被扣押嘅米糊以及一千元保釋金，你話係咪離譜吖？唔怪得內地網民炮轟香港海關傲慢喇！

喂，你又難怪人哋嬲到震喎，被冤枉嘅黃小姐曾經提出應該由海關負責來回旅費，對方拒絕咗，佢改為建議郵寄被扣嘅貨品同匯款，照樣被一口拒絕。試想想，為咗一千元保釋金長途跋涉再次花上一大筆旅費親身來港，值得咩？淨係買一張來回飛機票已經貴過一千元啦，懵丙！

大家咪以為今次只係個別例子吖，內地傳媒陸續揭發香港海關拉錯人，都唔知究竟有幾多內地人中招嘅喇。嗱，深圳有一位徐先生攜帶兩罐奶粉同三罐米糊離境，海關人員死口咬定佢違法，無端端惹上官非。後來海關發覺擺烏龍通知佢銷案，咁先至叫做沉冤得雪咋。

咦咦咦，早幾日唔係出現「三月落雹」嘅天文異象咩？有人話係地上冤氣太重搞到老天爺出手示警，可能真有其事噃，畢竟淨係海關已經炮製咗咁多冤案啦。

港府官僚話喎，有關商品種類繁多，相信海關已經吸取經驗同教訓，日後執法盡量避免出錯。律政司仲聲稱日後會考慮修例添。唉，限奶令搞到亂象叢生，依家唔補鑊，仲話要等日後至考慮修例，簡直九唔搭八。

好心海關生生性性啦，家陣中港矛盾咁尖銳，限奶令本身已經激嬲唔少國內同胞o架喇，有人提議限制東江水供港作為報復添。喺咁嘅情況之下，胡胡混混嘅海關一來好人當賊辦，二來拉錯人又唔肯道歉，身為香港人都覺得蒙羞啦。記住，香港係法治之區，唔係冤案之都呀！