再窮不能窮教育，再苦不能苦學生，聽講呢兩句係國內希望工程嘅座右銘，聽見都令人肅然起敬。之不過問題係，現實往往係殘酷嘅，莫講話國內特別多貪官同奸商，希望工程時不時淪為絕望工程，校舍更加係隨時砸死人嘅豆腐渣，就算係法治精神尚未破產嘅香港，教育事業都未必會堅持再苦不能苦學生。
呢嗱嗱嗱，又係樓價舖租貴到飛起嘅無窮禍患，亦即係地產怪獸繼續咬人。荃灣有一間歷史悠久嘅幼稚園喎，以非牟利機構註冊嘅，經營三十三年一直屹立不倒，即使係十年前沙士瘟疫蔓延咁惡劣嘅環境都捱得過去，偏偏今時今日遇上最黑暗嘅歲月。即係咁，擁有幼稚園所在物業嘅業主獅子開大口瘋狂加租，月租由原本十萬元加到接近三十萬！
喂，人哋幼稚園每個月嘅整體收入都係三十萬元左右，唔通一毫子都唔剩要全部上繳業主？不幸之中嘅大幸係，經過校長同業主多番討價還價之後，最近業主同意將租金「只係」加到十八萬元，具體情況仍在磋商之中。即使加到十八萬而唔係三十萬咁狼胎，加幅都八成吖，同撳住搶冇乜分別嘅咋。
除咗規模較細嘅幼稚園受到租金飆升嘅無情摧殘之外，集團式經營嘅幼稚園同樣身受其害。比諾教育機構校董兼校監張麗華就話嘞，機構旗下有四間幼稚園，三間未來要簽新租約，最少加二至三成租金。另外咯喎，位於上水嘅分校舊年續約，租金三年內由十幾萬增至三十幾萬，校方無可奈何將部分成本轉嫁畀家長，每月學費增加一、二百元。
租金係咁加，如果教育工作者唔將成本轉嫁畀家長，有冇其他辦法呢？有，削減開支囉，壓縮人手囉，受害嘅始終係學生。萬一有幼稚園頂唔順，索性搬走甚至執笠，冇書讀嘅學生真係淒涼嘞。就以飽受迫遷之苦嘅九龍灣淘大花園聖德肋撒幼稚園為例，去年業主通知今年不續租，二百名學生要暫時遷至慈雲山分校或者另覓學校。
喺香港呢一個地產怪獸無惡不作嘅畸形社會，基本上所有人都係地產商旗下嘅打工仔，理得你係幼稚園校長定係其他生意嘅老闆，只要你唔係買舖而係承租，你嘅收入必定被一紙租約蠶食得七七八八。
計功夫茶話齋，地產獨大等於百業凋零，如果連學校都苦無立錐之地，試問香港仲有乜嘢前途可言呀？若然再窮不能窮地產，買唔起樓又做唔起生意嘅香港人遲早一個二個瞓街o架咋。大家千祈唔好問，瞓天橋底得唔得？事關天橋底已經受到達官貴人關注，隨時改變用途，到時瞓都冇得你瞓！