過氣特首曾蔭權爵士嘅貪污醜聞每拖多一日未查清查楚，就會愈來愈令人懷疑官官相衞企圖不了了之，廉政公署嘅招牌亦會愈來愈多生銹嘅痕迹。喂，貪曾腐聞東窗事發已經一年有多嘞，廉署由前任專員湯顯明交棒畀現任專員白韞六亦有一段時間，竟然仲未查個水落石出向公眾交代，點講都講唔通啦！
大家千祈唔好嫌功夫茶對貪曾死咬不放，事關廉潔奉公係香港嘅核心價值，絕對唔容許有人徇私枉法，破壞香港得來不易嘅法治精神。功夫茶鄭重敬告白專員，貪曾案再拖落去係唔會有好結果o架，唔通閣下願意背負一個包庇香港第一貪官嘅千古罪名？
講到包庇香港第一貪官，最大嫌疑嗰個係湯顯明，無他嘅，呢兩個官場老油條交往甚深，而最重要嘅一點係湯顯明未卸任廉政專員之前，對於貪曾醜聞隻眼開隻眼閉。唔好唔記得喎，湯顯明由貪曾一手提拔為專員，然後又延長任命，直至兩人共同進退一齊做到二○一二年六月三十日夠鐘為止。咁難兄難弟嘅特殊關係，你話唔係「假包公放生真貪官」都冇人信啦。
好衰唔衰湯顯明其身不正，卸任之後仍然被翻舊帳，反映佢嘅廉潔程度原來都唔係幾高o架咋。湯顯明擔任專員五年期間，周遊列國總共外訪三十四次，平均每年七次咁多，足迹遍及五大洲。喂，你係廉政專員呀，唔係旅遊專員喎，有冇必要每隔個零兩個月就出埠一趟先？更何況，專員外訪梗係勞師動眾o架啦，每次都係前呼後擁成村人浩浩蕩蕩飛來飛去，合計耗費四百萬元公帑。正如立法會保安事務委員會副主席涂謹申話齋，湯顯明外訪次數確實相當高，所花公帑又相當多，質疑是否有必要。
大家都知啦，過度頻密嘅外訪往往係不廉不潔嘅表現，唔少官場中人以及公營機構都因此而出事。好似平機會幾個前主席咁吖，每次被揭公款私用都同外訪有關。當然唔少得貪曾呢一隻冇腳嘅雀仔啦，「離岸特首」利用公帑飛來飛去不特止，仲要餐餐入住海景酒店甚至總統套房，納稅人眼白白睇住自己嘅血汗錢化作全球各國嘅外匯收入。
即係咁，曾蔭權同湯顯明老友鬼鬼，大佬貪威識食，細佬有樣學樣，同樣熱愛亂花公帑搭飛機。功夫茶求神拜佛，湯顯明千祈唔好被揭發又係傍實大富翁吃喝玩樂或者入住超豪廉租屋，香港承受唔起呢一個「難顯廉明」嘅沉重打擊o架。
一句到尾，白韞六呀白韞六，幾時學似北大人咁講「蒼蠅老虎一齊打」？請記住，不反貪會亡黨，不防腐會亡港！