「挺身而出，舉報罪行」，大家對呢句宣傳口號係咪好熟呢？係吖，警方經常叫人做好市民，要勇於舉報，打擊罪案喎。可惜，口號還口號，現實還現實，喺現實當中，就算有人挺身而出舉報罪行，警方都未必會積極跟進。
功夫茶唔係亂噏，有辦你睇。話說有位馮女士早前喺葵芳新都會廣場一間超級市場購物時，懷疑畀人用針狀物體刺中左大髀近臀部位置，傷口一度紅腫及麻痹，到依家仲係赤赤痛。事發當日及第二日，馮女士兩度報案指懷疑遭人「拮針」施襲，點知警方僅將案件列作「有人意外受傷」處理，敷衍了事，搞到馮女士淪為人球，求助無門。無奈之下，佢只好向立法會議員求助，日前喺陳恒鑌議員及本報記者陪同下再次到警署報案。哈，今次警方態度居然一百八十度轉變，除咗將案件交由刑事調查隊跟進，以及要求涉案超市交出當日閉路電視錄影片段，仲召救護車接載馮女士到醫院接受詳細檢驗添，簡直係星級待遇吖。
呢啲咪叫做前倨後恭囉。警方對普通市民報案懶懶閒，但一見有議員及傳媒介入就即時轉軚，你話係咪好笑吖。正如陳恒鑌議員話齋，有市民懷疑被不明來歷嘅針狀物件刺中，警方理應提高警覺認真調查，點可以草率了事o架，「依家隔咗成十幾日，好多重要線索可能已經冇晒，如果再有無辜人士受害，咁邊個要負上責任？」冇錯嘞，唔好睇小拮針事件，可大可小o架。當年新疆爆發民族衝突，唔少漢人被針拮傷，搞到人心惶惶；而更得人驚嘅係，舊年上海及北京分別發生愛滋針拮傷人事件添。
有資深報案室警員就話嘞，市民報案淪為人球，可能係存在溝通上嘅誤會。根據正確程序，若市民報稱遭人襲擊到醫院警崗報案，警員應向報案人發一張「差紙」，由醫生確定係咪襲擊造成；若到警署報案，值日官可通知軍裝警員陪同報案人重返現場蒐證。咁就奇嘞，既然有正確程序，點解警方今次又唔按本子辦事呢？睇嚟誤會係假，懶惰就真。
講到懶惰，其實天下烏鴉一般黑，港產官僚普遍抱着多做多錯、少做少錯、唔做唔錯嘅心態，懶惰根本就係佢哋嘅通病，又點只警方係咁吖。正所謂，禮失求諸野，香港好彩有正義傳媒為民喉舌，監督政府，港產官僚先至唔敢咁離譜嘅咋。就好似今次事件咁吖，如果唔係本報記者及議員介入，警方都唔會前倨後恭，馮女士都唔會得到星級待遇喇。所以話，求政府不如求傳媒，有東方太陽照住，市民至可以見到青天！