氣槍當然唔係真槍，一般稱之為玩具槍。之不過咁喎，大家又唔好睇小氣槍，近距離射擊都會產生痛楚嘅感覺，情況就好比有人向你彈橡筋，係就係冇乜殺傷力，但係都會痛o架。
萬一唔知邊個咁頑劣，竟然將氣槍改裝，射擊嘅力度更加非同小可。冇耐前之嘛，屯門三聖邨對開馬路發生氣槍狙擊案，一架滿載乘客嘅小巴懷疑被改裝版氣槍嘅子彈射中，玻璃窗整幅爆裂，一名男乘客被玻璃碎濺傷送院治理。呢一單氣槍襲擊事件，係十日之內嘅第三宗，其他同類案例包括天水圍有途人無端端成為人形活靶。
好嘞，功夫茶今日主要想講嘅係，好心香港人唔好咁野蠻啦，氣槍唔好射人，亦唔好射動物，犯法就唔好啦，隨時監都有得你坐！
最近有網民上載圖片，顯示一名男子捉住小朋友隻手，教佢用氣槍射擊獼猴。喂，馬騮仔係受保護動物嚟o架，根據《野生動物保護條例》，任何人士不得捕獵或故意干擾任何受保護野生動物，一經定罪最高可被判罰款十萬元及監禁一年。另外根據《防止殘酷對待動物條例》，虐待動物最高可被判罰款二十萬元及監禁三年。
功夫茶真係唔明嗰個氣槍男子搞乜鬼，好玩唔玩竟然玩殘受保護動物，仲要教壞細路用氣槍射。正如上載圖片嘅網民話齋：「呢啲咁嘅家長真係不知所謂，教個仔用氣槍射馬騮，大個仲得了？」
冇錯嘞，大個仲得了？容乜易嫌氣槍唔夠過癮，走去用真槍亂槍掃射o架。大家睇下槍械軍火氾濫成災嘅美國吖，好多人就係因為玩槍成癖，卒之槍擊案屢見不鮮，時不時濫殺無辜血洗校園。弊就弊在美國擁槍派人多勢眾，討論到口水乾嘅槍械管制始終阻力重重。
呢嗱嗱嗱，大家唔好以為香港嘅槍械管制做得好好呀，事關改裝氣槍輕而易舉，否則都唔會出現氣槍子彈射爆玻璃嘅恐怖場面啦。根據現行法例，氣槍子彈嘅動能不准超過二焦耳，如果非法改裝至二焦耳以上威力等同於非法藏械，最高可判監十四年。
針對連串氣槍狙擊案，警方重案組搜查旺角廣華街一間氣槍店，拘捕三男三女，檢獲三十九支長槍同八千五百發氣槍或彈簧槍專用嘅金屬子彈。大家估下最高性能嘅改裝氣槍有幾大威力吖嗱？答案係超出法例限制嘅七點五倍！
即係咁，氣槍玩還玩，絕對唔容許改裝成為大殺傷力武器，更加要嚴格禁止亂射人畜。功夫茶建議警方按圖索驥緝拿嗰個教細路用氣槍射獼猴嘅壞蛋，另外好好管束氣槍店，唔好再學似以前咁懶於執法喇！