雖然話生老病死係人之四苦，不過未必人人都會經歷老化階段，畢竟英年早逝唔係罕見嘅人間悲劇。亦即係話，歲月流逝韶華老去既係四苦之一，同時亦算得上一種延年益壽嘅福氣，不必淪為短命種吖嘛，如果可以安享晚年更佳。
之但係好可惜，安享晚年實在係遙不可及嘅春秋大夢。你知啦，香港缺乏全面退休保障，強積金極其量聊勝於無，基金經理唔將你嘅棺材本蝕清光已經還得神落。更加可悲嘅係特區政府嘅安老政策乏善足陳，老人家隨時等到死都冇辦法入住老人院。即使有幸得到長者院舍一個床位，大家唔好以為咁就叫做安享晚年喎，事關長者院舍嘅護理人手嚴重不足。
香港社會服務聯會委託香港大學社會工作及社會行政學系做過調查，安老服務機構嘅基層護理人員十分短缺，個人照顧員去年有五百三十人離職，家務助理職系亦有一百人離職，流失率分別係兩成三同兩成二。因乜事幹離職呢？主要原因係薪金不理想，其次係工作時間不配合以及工作壓力大，兩項工種嘅空缺率分別係一成二同接近一成。
港大社會工作及社會行政學系副教授羅致光就話嘞，半數受訪者係五十歲至五十九歲，四十歲以下只佔一成，反映未來十年安老業界將會面臨退休潮，而且缺乏新人入行。
尋日喎，立法會福利事務委員會討論到相關議題，你估下尊貴議員有乜嘢意見吖嗱？當然係炮轟政府漠視問題嘅存在啦。議員張超雄批評人手短缺源於一筆過撥款制度，政府同資助機構扯貓尾互相卸責。另一議員梁國雄認為，呢個制度造成「撥款增加但人工唔加」。委員會最終通過無約束力動議，促請政府改善基層護理人員待遇以及晉升階梯。
計功夫茶話齋，講來講去都係港產官僚未老先衰腦退化，即使有腦都不用腦。喂，人口老化問題講咗N年啦，安老服務需求大增係人盡皆知嘅事實，若然官僚有腦又肯用腦，點會搞到一塌糊塗呢？莫講話長者院舍護理不足吖，整體安老政策都係天殘地缺。政府早於○七年成立人口政策督導委員會，話會研究未來三十年人口結構變化喎，並且提出應對策略添，咁多年以來實際上交出乜嘢功課呢？唔好意思，功夫茶真係聞所未聞囉。
好心港產官僚生生性性啦，人口老化係必然現象，安老問題遲早都要解決，而且牽涉到退休高官嘅切身利益。試想想，萬一有任何一位退休高官風燭殘年淪落到瞓街，而唔係受惠於適當嘅安老政策，你話係幾咁折墮呢！