後日係四月一日愚人節，唔知社署官僚究竟係攞景定贈興，長者生活津貼安排甩甩漏漏，烏龍百出，唔只玩殘老人家，直情係愚弄老人家喇！
嗱，根據社署安排，所有六十五歲以上已領取生果金並已通過資產審查嘅長者，本應喺第一階段即二月底收到綠色通知書，可以由生果金自動轉換領取長津，點知社署聲稱電腦系統出咗問題，唔少合資格長者望穿秋水都收唔到綠色通知書，反而最近紛紛收到黃色通知書，話需要填報資料重新申請喎。
咁就靠害啦！明明符合資格，可以輕輕鬆鬆自動轉換長津，家陣變咗要重新申請，一拖又唔知要拖到幾時，你都咪話唔徬徨吖。正如有老人家話齋，自己已經風燭殘年，就算有精力重新申領，都未必有命享喇。
再講吖，填報資產內容複雜，後生仔都搞到一頭煙，何況係老人家。咁搞法，都唔知長津究竟係想幫助長者，定係折磨長者。你話喇，老人家心血少，點經得起咁嘅折磨吖。唉，長津本來可以袋袋平安，依家變咗唔上唔落，今次真係畀港產官僚玩殘。
有立法會議員踢爆，二月至今已接獲五百幾個長者投訴，其後向社署了解，得知原來係電腦出問題而導致資料遺失，直斥社署害苦長者，簡直不能接受。話時話，政府每年都為資訊科技撥出經常性開支，如果連電腦更新呢個最基本要求都做唔到，好唔合理啫！
講到底，人嘅因素第一，長津玩殘長者，主要唔係電腦嘅問題，而係社署官僚人頭豬腦嘅問題。喂，電腦遺失資料就要長者重新申請，咪即係要長者幫你哋承擔失職嘅責任，咁通唔通呀？又唔見電腦問題會影響你哋出糧？
所以話，真正玩殘長者嘅，唔係黃綠通知書，而係黃綠官僚，如果社署官僚作風不改，長者嘅噩夢肯定陸續有來。其他唔講，就講為長津而設嘅電話熱線吖，之前已經被長者投訴打極都唔通，有人試過打咗三日三夜都冇人聽，後來社署認衰補鑊，話增加咗多條熱線喎。家陣又點呢？一樣打唔通嘅咋。社署咁樣做嘢，莫講長津熱線黐晒線啦，全港長者都就快畀佢哋激到黐線。
唉，港產官僚教而不善，幾時至會長進呢？長津熱線變「冷線」，長津通知書變長者統統輸，本來好地地一個長津計劃，被視為可以惠及幾十萬老人家嘅德政，結果搞到七國咁亂，怨聲載道，德政變劣政，好事變壞事，簡直豈有此理！
嗱，立法會議員要求社署補鑊，盡快檢視電腦系統。而計功夫茶話齋，電腦固然要檢視，但更重要都係檢視人腦先！