成日都話o架啦，上有政策，下有對策，尤其係古靈精怪嘅中國官場，更加係講一套做一套。即係咁，第五代國家領導人上台之後誓神劈願咁話，必須反貪防腐，否則亡黨亡國，一定要雷厲風行節約慳儉，唔可以再左揈右揈浪費公帑。正氣凜然講到驚天地泣鬼神，實際上當然係另一回事。
呢嗱嗱嗱，大家睇下內地官僚點樣熱情招呼香港一個過氣特首吖，勞民傷財嘅非凡氣派再一次凸顯中國官場浪費成風。所謂過氣特首，咪就係貪腐醜聞纏身依然逍遙法外嘅曾蔭權爵士囉，佢繼早前被發現勞師動眾去到廣東辦年貨同玩餐飽之後，上星期又出現喺江蘇省高淳老街。為咗唔好怠慢貪曾伉儷，江蘇跨省遊嘅團友包括廣東省港澳辦及接待辦官員，仲有高淳縣委書記同縣長一干人等，浩浩蕩蕩前呼後擁，專車開路等於霸道，唔使太豐富嘅想像力都諗到當時係幾咁擾民。
好嘞，功夫茶問問大家，貪曾夠鐘執包袱落台唔再係特首之後，又因為臭名遠播而做唔成政協副主席，家陣到底係乜嘢身份呢？冇錯，佢乜都唔係，只係英國爵士，國產官僚居然費時失事去接待一個大不列顛帝國嘅假洋鬼子，講起都唔知好嬲定好笑。更好笑嘅係，貪曾接受內地雜誌專訪時竟然自爆，曾由專家陪同乘坐特殊船隻到普通市民不准進入嘅香港濕地禁區拍攝黑臉琵鷺，你話係咪無法無天吖。
官官相衞呢家嘢，睇怕都係天下烏鴉一樣黑，中國官場紆尊降貴去請一對英國爵士夫婦遊山玩水，當中梗係有私心啦，請人嗰個自己都可以利用公帑吃喝玩樂吖嘛，一家便宜兩家着，甜頭不吃白不吃。
講到呢度，功夫茶諗起幾年前嘅車公靈籤，當時仲係曾蔭權主政嘅年代。○九年大年初二鄉議局主席劉皇發隆而重之去到車公廟求籤，求得第廿七籤下籤。籤文係咁講嘅：「君不須防人不肖，眼前鬼卒皆為妖，秦王徒把長城築，禍去禍來因自招。」
喂喂喂，呢支下籤靈到難以置信啦，貪曾做特首嘅年代確實係禍去禍來因自招，施政失敗唔在講，更加由於以權謀私而搞到接受廉署調查。唔好忘記喎，貪曾手下特區第二把交椅嘅政務司司長許仕仁，已經涉嫌官商勾結而被廉署拘捕，反映曾家班醜聞多多，眼前鬼卒皆為妖就係咁解。
計功夫茶話齋，好心廉署加快調查速度啦，快手快腳將貪官繩之以法，唔好畀佢繼續穿梭往來有損市容。法律制裁貪官不但有益於香港，同時有功於國家。試想想，若然任得一個貪腐醜聞纏身嘅爵士暢遊神州，亦即係助長中國官場同流合污，情況就等同於縱容「雀屎禍國」，恥與為伍嘅炎黃子孫都會嫌自己一身臭啦！