提起深水埗，好多人就會諗起「殘舊」、「貧窮」呢類字眼，同「潮流」、「創意」大纜都扯唔埋。不過世事無絕對，呢個舊社區分分鐘產生世界級設計大師o架。
嗱，區內有個好出名嘅舊貨夜市，每晚十點半準時開檔，衫褲鞋襪、文具雜誌、傢俬電器包羅萬有，吸引唔少基層人士同遊客幫襯。上個禮拜六，夜市出現一批年輕新面孔，賣嘅唔係二手貨，而係畫作、相片、飾物同家具呢類創意產品。
原來，呢個係本港幾位設計師發起嘅「夜好趁墟行動」，邀請年輕設計師同藝術家「趁墟」擺地攤。今次另類銷售活動吸引咗好多年輕人嚟尋寶，連唔少外國遊客亦嚟捧場，場面夠晒熱鬧。
點解咁旺場？答案好簡單啫，擺地攤唔使畀貴租，慳番一大筆之餘，仲可以同其他同道中人互相交流切磋，直頭係一舉多得喇。正如活動搞手話齋，香港舖租貴，本土年輕藝術家同設計師缺乏展覽同銷售場地，設計夜墟可以為佢哋提供現成嘅交流平台。
係人都知，因為前朝曾蔭權政府施政失誤，樓價失控，租金狂飆，唔止趕絕小商戶，亦扼殺埋本地創意工業嘅生存空間。冇錢開舖推廣產品，設計師創作意念再好都嘥氣，只能束之高閣等運到。
其實扼殺創意嘅除咗高不可攀嘅租金，仲有墨守成規嘅港產官僚。貪曾任內將創意產業列為六大產業之一，其實係畫餅充飢冇料到，增撥資源、培訓人才、政策配合，講到天花龍鳳，到頭來全部係大隻講，創意推手原來係創意殺手。
講開又講，設計夜墟除咗令年輕設計師同藝術人才可以發揮所長，展示創意，更可以令八十後及九十後年輕人搵到新方向，發揮正能量。由於教育同就業政策失敗，唔少年輕人讀完書高不成低不就，畢業變失業，終日無所事事，隨時誤入歧途，甚至釀成倫常慘劇添。
同其他新生事物一樣，呢類創意活動冇可能十全十美，當日有攤販不滿年輕人「阻住做生意」同噪音太大，雙方發生口角，甚至驚動警方。其實，如果當局透過制訂守則加強監管，或者為佢哋提供合適嘅場地，呢種創意推廣模式完全可以開花結果，大有機會發圍。
只要思想不滑坡，辦法總比困難多。香港年輕人唔缺創意，缺少嘅係發揮創意嘅空間。北京有廢棄電子廠蛻變重生嘅798民間藝術區，台北有舊酒廠變身嘅華山文創園區，香港亦可以化腐朽為神奇，因勢利導將二手貨夜攤變成設計師樂園，問題係港產官僚肯唔肯做嘢啫！