有工開冇飯開，會唔會殘忍咗少少？偏偏今時今日仍然有部分僱主相當無良，開工期間唔畀員工開飯，就算有飯開都唔計人工，你都咪話唔慘情。喂，食飯係人類最基本嘅生存條件，開工期間竟然冇飯食，冇飯鐘錢，你估納粹黨集中營咩！
有一個關注勞工權益嘅團體叫做「有薪用膳時間關注組」，顧名思義嘞，呢個團體非常關注勞工嘅食飯問題，兩年以來一直爭取政府同公營部門貫徹公平原則，統一員工嘅每周工時係四十四個鐘，包括俗稱「飯鐘」嘅有薪用膳時間。日子有功，長期努力之下，關注組終於得到初步成果，醫管局將於今年五月一日開始，所有員工嘅工作時間統一為每周四十四小時包飯鐘。
既然醫管局從善如流，勞工團體係咪應該額手稱慶呢？本來係嘅，之不過咁，革命尚未成功，同志仍須努力。關注組對於醫管局以外嘅其他政府部門照舊滿腹牢騷，原因好簡單，仲未有飯鐘！
好似食環署咁吖，八成戶外工作嘅員工每周必須做足四十五小時，但係唔包飯鐘。所以咯喎，有薪用膳時間關注組覺得好遺憾，認為政府對於有關訴求始終無動於衷，對佢哋長久以來嘅爭取冇半點承諾，一定要抗議咁話。
大家不妨設身處地想一想，由朝早做到中午，再由中午做到下晝，連食飯時間都唔計人工，你話係咪刻薄吖？
除此之外，政府對待外判工人亦係隻眼開隻眼閉，任得外判公司巧立名目剝削佢哋嘅權益。香港物業管理及保安職工總會嘅調查顯示，政府外判保安公司喺合約到期嘅時候，三成三員工未有獲得僱主支付遣散費。工會另外又發現，民政署新聘嘅保安外判商為咗削減人手，將保安員嘅每日工時由八個鐘延長至十二個鐘，藉此減省三分之一人手。
假如功夫茶係幫政府間接打工嘅勞動階層，真係會嬲到眼火爆o架，飯鐘錢已經冇啦，合約期滿連遣散費都冇，仲要日日捱足十二個鐘，你估家陣係一千年前嘅奴隸社會咩！
工種外判唔等於責任外判，呢個係人所共知嘅合理期望，政府身為一眾勞動階層嘅終極大僱主，冇理由縱容外判商刻薄成性嘅，吓話？外判商刻薄即係大僱主無良，勞工團體唔嘈到拆天至奇啦。
有工開冇飯開，不期然令人諗起法國大革命嘅悲慘世界。功夫茶贈官老爺一句，千祈唔好學似法王路易十六咁樣激嬲群眾，小心人頭落地呀！