天秀墟，天天發愁，又瘦又虛。唉，好好一個地區墟市，搞到門庭冷落，拍晒烏蠅，開業一個幾月已經幾乎散檔咁滯，你話唔愁就假！
邊度係天秀墟？嗱，如果你對呢個社企項目毫無印象，絕對正常o架，事關根本都唔見有宣傳，唔拍烏蠅至奇啦。係咁嘅，天秀墟位於天水圍，由政府斥資一千萬元發展，由東華三院負責管理，內有一百八十二個月租檔位，上個月正式開業，點知一試水啫，即刻掀起檔販跳船潮。
唔少檔主投訴，天秀墟開業以來人流稀少，每日小貓三四隻，試過一日淨係做咗三十五蚊生意，甚至全日無發過市，你都咪話唔慘情。本報記者直擊發現，有檔販索性兼做走鬼檔，轉到附近空地擺賣，幫補檔租。更誇張嘅係，唔少檔販見勢色唔對，打算棄租離場。睇嚟天秀墟隨時可以打破本港墟市散檔最快紀錄咯。
唔通真係宿命？天水圍畀人叫悲情城市，難得有機會注入生氣，居民可以自力更生，點知又係落得悲涼結局，你都咪話唔信邪。其實，台灣同泰國等地嘅墟市多數搞得生氣勃勃，成為財源滾滾嘅旅遊景點，如果天秀墟一枝獨秀，有聲有色，莫講地區居民得益，成個香港都受惠o架。可惜吖，天秀墟唔係搞到有聲有色，而係搞到唔湯唔水，檔販慘淡經營，血本無歸，真係人比人，激死人。
講到底，天秀墟營運失敗，唔係宿命，而係人禍。嗱，一項調查顯示，逾五成半檔主認為天秀墟選址錯誤，偏離人流，營運設計更加甩漏百出，最少有六大問題，包括缺乏遮擋陽光設施導致太熱太曬、沙地設計搞到塵土飛揚、宣傳不足同出入口不足等等；七成六檔主認為港府應負最大責任，五成八人要求當局向檔主賠償。
所以話，港產官僚做嘢幾咁求其吖。用咗咁多公帑，天秀墟居然搞到天殘地缺，簡直就係浪費資源。如果有心幫助居民，點解唔做多啲宣傳呢？如果有心發展墟市，點解唔規劃得好啲呢？求其做咗嘢就算，由得檔販自生自滅，天秀墟點會唔搞到又瘦又虛呢？計功夫茶話齋，檔販血本無歸，港產官僚難辭其咎，如果你哋仲係渾渾噩噩，敷衍塞責，搞到天秀墟奄奄一息，何只畀人要求賠錢，遲早要你哋陪葬添呀！
一句講晒，官僚無能，累人累物。港府做乜都馬馬虎虎，得過且過，永遠抱住趁墟心態，外國搞墟市成功吖嘛，香港又搞囉，但就魂遊太虛，一舊雲咁，搞到好事變壞事，幫人變害人，呢啲咪就係充滿香港特色嘅官僚主義囉！