雖然印度不斷發生令人髮指嘅風化案，大家唔好笑人哋係「強姦之都」，因為香港都唔係好得幾多o架咋，隨時被笑番轉頭。你知啦，本地港產同胞接二連三炮製血腥到極嘅命案，萬一人哋笑香港係「謀殺之都」，咁就唔好聽啦。
最近命案發生頻率之高真係嚇到你三魂唔見七魄，先係忤逆仔殺父弒母再碎屍，跟住另一個忤逆仔殺父傷母，然後整多一單孽緣女主角殺夫自殺。三宗命案總共死咗五個人，有人話「三月落雹」係大凶之兆，唔係冇道理喎。
三宗命案之中有兩宗嘅性質相當近似，同樣係不孝兒子涉嫌手刃雙親，禽獸不如嘅疑兇一樣係沉迷打機嘅宅男，而佢哋竟然都有臭味相投嘅豬朋狗友願意擔當幫兇。
兩個疑兇宅男沉迷打乜嘢機呢？大角咀碎屍案嗰個最鍾意玩格鬥遊戲，而元朗八鄉殺父傷母嗰個亦不遑多讓，亦係暴力遊戲嘅發燒友。
刀光劍影嘅暴力遊戲到底會唔會教壞細路呢？虛擬畫面嘅殺人如麻會唔會誘發現實世界嘅血流成河呢？雖然呢一類問題見仁見智有待爭論，暫時冇統一嘅共識，不過美國早就實施遊戲評級制度，禁止暴力遊戲賣畀未成年嘅青少年。美國總統奧巴馬更加針對一連串嘅校園槍擊案而提出五億美元措施，其中一項係研究暴力遊戲對槍械犯罪嘅影響。
簡單咁講，暴力遊戲以殺人為樂，消滅敵人會得到獎勵，確係令人擔心玩家嘅價值觀會受到扭曲o架。正如學者所講，長期睇住啲畫面係透過用暴力而取得成功，會令青少年嚮往暴戾嘅方法，更會認同遊戲嘅價值觀，一旦面對困難，有機會傾向用暴力解決問題。
嗱，暴力遊戲有機會影響到玩家產生暴力傾向，美國又有先例實施遊戲評級制度，香港係咪應該見賢思齊，禁止暴力遊戲賣畀未成年嘅青少年呢？好對唔住，特區政府基本上全無監管可言，話之你遊戲內容係幾咁血肉橫飛，心智未成熟嘅中學雞甚至小學雞照樣可以買得到大玩特玩。負責監管嘅電影報刊辦發言人話喎，現時法例並無規定相關物品發布前必須送檢，報刊辦會巡查本地出版物品，過去曾處理三宗電子及網絡遊戲投訴涉及不雅或淫褻，經調查後全不成立。
唉，暴力遊戲氾濫成災，玩暴力隨時變真暴力，官老爺居然坐視不理。好心電影報刊辦唔好咁懶啦，亦都唔好本末倒置，人哋藝術作品着少件衫露出人體器官啫，唔使又告又罰o架，反而販賣血腥暴力嘅電子遊戲有機會觸發殺人動機，呢啲先至真係要嚴加管束吖嘛，笨蛋！