嘩，唔講大家可能唔知，現時全港有五萬七千五百部升降機，估計每人每日平均乘搭升降機或自動梯上落嘅次數不少於四次，亦即係話每日全港嘅總乘客量高達二千八百萬人次，比乘搭港鐵嘅四百九十萬仲要多出幾倍。
既然使用升降機嘅搭客多得咁交關，安全問題係咪應該高度關注呀？理論上當然應該係咁啦，不過本地官僚好抵死o架，冇事冇幹就乜都唔理，有事有幹就推卸責任。好似土瓜灣馬頭圍道唐樓坍塌事件咁吖，未死人冧樓之前屋宇署話過冇問題o架，一出事啫，所有責任都推到裝修承建商身上，任由一個領綜援嘅伯伯孭起成隻鑊。法官大人又好笑喎，冧樓導致四人死亡，罰款只係區區一萬大元，平均一條人命只值二千五百元，樓價貴到飛起嘅今時今日買一格階磚都唔夠。
好嘞，功夫茶問問大家，乘搭升降機最怕係乜嘢呀？答案好明顯啦，搭升降機最怕跳樓機，萬一斷纜直墮升降機槽，分分鐘命仔不保呀。好衰唔衰喎，搭升降機遇上跳樓機時有所聞，最近一單係北角英皇道昌明洋樓升降機發生急墮事件，七個搭客大話夾好彩只傷不死，算係不幸之中嘅大幸。
發展局局長陳茂波話喎，傷亡意外一宗都嫌多，北角肇事升降機嘅鋼纜全部斷裂，安全制動系統失效，雖然第一次發生，但係絕對不可接受，將會成立「升降機及自動梯安全諮詢委員會」，檢討完善規管制度，並且加強抽驗機齡高及經常故障嘅升降機，確保市民安全。
針對北角墮升降機造成七人受傷，機電工程署調查之後決定，吊銷負責維修保養嘅信科工程有限公司牌照六個月，並且不排除會提出檢控，吊銷牌照由五月一日起生效。機電署副署長薛永恒就話嘞，吊銷牌照非常嚴重，今次只係法律行動嘅第一個環節，仍然會繼續調查，未來幾個月會積極考慮更多嘅法律行動。
其實計功夫茶話齋，既然信科維修保養失職，固然係要受到吊銷牌照之類嘅懲罰啦，不過機電署一樣責無旁貸，畢竟呢一個政府部門係負責規管所有維修公司嘅。打個譬喻吖，維修公司就好比一部升降機，機電署冇好好規管令到佢哋鋼纜全部斷裂，砰嘭一嘢直墮升降機槽，機電署係咪應該捉去打屁股呢？如果功夫茶係手執生殺大權嘅特區之首，肯定會積極考慮吊銷薛永恒等等一眾官僚嘅牌照，最低限度停職六個月冇得出糧，咁先至對得住因墮升降機而受傷嘅無辜市民。
咦，幾乎講漏咗陳茂波。波叔記住呀，規管不容再斷纜，唔通真係要吊銷局長牌照咩！