如果你舉行婚禮，準備觥籌交錯大宴親朋，你會唔會向扶貧委員會尋求贊助呢？又假設，你計劃開生日會，招朋引伴慶祝閣下唔知幾多歲大壽，你會唔會向關愛基金申請撥款呢？正常而言梗係唔會啦，即使最唔爭氣嘅宅男宅女頂多攤大手板問老竇老母攞錢，因為扶貧委員會同關愛基金嘅主要作用係支援窮等人家，有手有腳牛龜咁大隻嘅你冇可能走去分薄N無人士嘅資源，乞兒兜揦飯食好缺德啫。
所以咯喎，香港發生咗一單「大學生與貧爭食」嘅事件，真係令人感到悲哀o架。成件事係咁嘅，深水埗有一間以良心見稱嘅燒臘飯店，老闆係俠義心腸又愛心爆棚嘅明哥陳灼明，經營方式係廉價食品益街坊，時不時仲會向草根階層同露宿者免費派飯。勢估唔到嘅係，浸會大學有五個學生組織竟然打明哥主意，為畢業禮等等活動尋求贊助，即係抌心口要明哥呢一個絕世好男人提供免費飯餐，畀學生哥開開心心飲飲食食。
喂，人哋開嘅係良心飯店，幫嘅係弱勢社群，堂堂大學生居然一個二個走去尋求贊助，好冇品啫。事件由網民揭發，然後網上瘋傳，卒之搞到全城沸騰，得理不饒人嘅萬千網民唔係譴責就係怒插。學生哥原本仍然死撐o架，砌詞狡辯話自己冇錯，不過輿論壓力實在太大嘞，浸大學生組織一日之內六度發出新聞稿解畫，最終更加有學生拉大隊親自上門向明哥道歉賠罪。據講學生尋求贊助嘅時候唔知道良心飯店嘅背景，以後唔會再犯同一錯誤喎。
唉，果然係年少無知，好彩明哥寬宏大量，就算有被搵笨之嫌仍然處處維護呢一班大學生，佢話呀：「我都冇怪佢哋，公眾唔好再責怪落去，亦都唔好再窮追猛打。」
計功夫茶話齋，既然無知學生願意道歉，知錯能改，善莫大焉，港人同胞不妨響應明哥嘅呼籲，鬧完插完就算鬼數，真係唔好再打落水狗，畀機會呢一班學生哥痛改前非，好好領悟今次經一事、長一智嘅成長過程。不如咁啦，若然相關學生有誠意悔過，不妨以實際行動協助明哥做義工，向一貧如洗嘅街坊街里派飯。
各位同學仔，記住呢個慘烈教訓呀，窮人飯碗係不能夠搶o架，一搶就會惹來千夫所指。係，事前唔知明哥嘅俠義事迹，勉強可以話係不知者不罪，之但係唔知咪要問囉，問個清楚明白先至係求學不是求分數嘅學問之道吖嘛。
點都好啦，大學之道在明明德，明德即係光明正大嘅仁義道德，讀大學唔應該讀壞腦，各位同學共勉之，千祈唔好做一隻貪威識食嘅共勉豬！