山雨欲來風滿樓，香港進入多事之秋，風風雨雨，紛紛擾擾，幾乎永無寧日，令人不勝其煩。呢，「佔領中環」仲未開波，近日先上演咗一場佔領碼頭嘅工潮，搞到沸沸揚揚，欲罷不能，而且成為國際新聞添，都唔知點樣收科。
即係咁，香港係資本主義社會，勞資天生就係一種矛盾，發生工潮一啲都唔出奇。奇就奇在今次工潮已爆發一個禮拜，勞資雙方各持己見，僵持不下，而港產官僚居然袖手旁觀，若無其事咁，尤其係負責勞工事務嘅高官，一個二個玩失蹤，真係服咗佢哋。正如工會話齋，工潮爆發後，政府高官從未同工人接觸過，亦冇積極介入斡旋，簡直係縮骨兼卸膊。
其實，姑勿論今次誰是誰非，既然工潮已影響社會安定，損害本港經濟，港府無論如何都唔可以袖手旁觀o架。道理好簡單，發生咁大規模嘅工潮，就算勞福局局長張建宗唔出面，勞工處處長卓永興都要介入喇，呢幾日佢哋究竟去咗邊呢？張建宗直至尋日先至露面，而卓永興仲係無影無蹤，你話係咪離譜吖。
嗱，唔好話工潮屬於勞資糾紛，唔關政府事吖。係人都知，物流業係香港四大經濟支柱之一，今次工潮涉及本港最大嘅貨櫃碼頭，工潮持續，影響貨運，後果可大可小o架。身兼付貨人委員會副主席嘅立法會議員林健鋒警告，長時間工潮會影響出入口，特別係新一輪出口高峰期即將來臨，若工潮持續，付貨人可能要轉用深圳鹽田及蛇口等鄰近碼頭，令運輸成本大增，最終轉嫁到消費者身上。
正所謂，黃台之瓜，何堪再摘，香港面對嘅國際競爭愈來愈大，物流業逐漸走下坡，優勢已所餘無幾，再咁搞落去，增加運輸成本事小，玩死自己事大吖。嗱，以前香港係全球最大貨櫃港，近年新加坡及上海已後來居上，深圳亦步步進逼，香港遲早淪為阿四嘅咋，你話仲玩唔玩得起吖？
講到底，香港搞到咁嘅地步，港產官僚必須負起最大責任，佢哋冇心冇肺，敷衍塞責，淨係掛住自己逍遙快活，根本冇做好呢份工。大家應該仲記得，舊年本港一名兩歲男童被確診感染禽流感，拉響防疫警報，當時負責抗疫嘅食衞局局長周一嶽及衞生署署長林秉恩唔只冇第一時間作出應變及通報，反而聯群結隊走去南丫島食海鮮，簡直匪夷所思。所以話，旨意高官排難解紛，解決工潮，蚊都瞓蛇都死喇。
唉，香港本來已經夠亂嘅喇，加上一時遊行，一時工潮，爭拗無日無之，都唔知仲要亂到幾時。唔通香港真係氣數已盡！