港產官僚冇嘢叻，最叻補鑊。每逢發生嚴重事故，佢哋梗會煞有介事檢討一番，然後實牙實齒承諾採取措施加強監管，防止事故再次發生咁話。可惜次次都係大隻講，講完就冇咗件事，所以事故咪不斷發生，悲劇咪不斷重演咯。
呢，好似前年發生嘅花園街四級大火慘劇咁吖，死因庭前日裁定九名死者死於意外，裁判官狠批監管部門敷衍塞責，其中消防處份調查報告用咗一年零三個月時間完成，結論居然係起火原因不明，簡直係浪費納稅人米飯。署理行政長官林鄭月娥尋日回應，指相關部門已作出多方面跟進，包括食環署加強監管全港四十三個排檔區，屋宇署及消防處加強巡查舊樓安全及消防隱患，民政事務總署亦已為受影響災民提供即時援助喎。
其實，排檔問題多多，劏房危機重重，呢啲早就要解決喇，依家先至補鑊遲唔遲啲吖。就以加強監管排檔嚟講，食環署今個夏天啟動五年計劃，資助全港約四千三百名小販喺原址重建，或者向因安全理由而須搬離嘅排檔提供一次性財政資助，並為自願交回小販牌者提供特惠金。嗱，兩年前發生大火慘劇，食環署家陣至話加強監管，你話係咪慢咗幾拍吖。
至於屋宇署同消防處巡查舊樓更加係慢條斯理，屋宇署去年查咗三百幢舊樓咁大把，當局聲稱要用一年時間至可以查完六千五百幢舊式樓宇喎。睇嚟舊樓尤其係劏房居民真係要求神拜佛唔好再發生火警，否則隨時又係死得人多嘅咋。
正如有立法會議員話齋，每次發生大火或其他事故，港府就會大鑼大鼓進行巡查及檢控，可惜治標不治本。依家最大嘅問題係基層市民別無選擇，明知有危險，都要被迫住喺殘舊嘅劏房，呢啲舊樓又缺乏保養，又冇業主立案法團，港府點樣確保其消防安全呢？講到底，舊樓問題多多，危機重重，就算當局點樣加強巡查，都冇可能消除所有安全隱患，治本之道係加快興建公屋，為基層市民提供安全居所，咁至可以解決問題吖嘛。
預防勝於治療，好多悲劇本來係可以避免嘅，只因港產官僚漫不經心，敷衍塞責，悲劇才會不斷重演。就以大樹倒塌壓死路人為例，當局次次都話事前檢查過冇危險，點知嗰頭檢查呢頭出事，大樹塌完一棵又一棵。所以話，官僚靠得住，豬乸會上樹。
無論點都好嘞，事故一宗都嫌多，市民唔係想睇港府點樣補鑊，而係點樣防止事故發生。花園街火災慘劇涉及排檔管理、劏房亂象等問題，多個政府部門都有責任，除咗吸取教訓，採取措施堵塞漏洞，最緊要做好自己份工，唔好再渾渾噩噩呀！